Vetëm në pak javë që prej nisjes së presidencës amerikane të Donald Trump-it vjen dhe dorëheqja e parë, dhe jo dosido, por ajo e këshilltarit të sigurisë kombëtare.
Shtëpia e Bardhë njoftoi se Michael Flynn ka dhënë dorëheqjen për kontaktet e tij me zyrtarët rusë. Pretendohet që ai t’i ketë diskutuar me ambasadorin rus sanksionet amerikane përpara se Trump të merrte detyrën.
Një mbështetës besnik i presidentit të tanishëm amerikan, dorëheqja e këshilltarit të sigurisë kombëtare pas më pak se një muaji është një tronditje e jashtëzakonshme për administratën e re.
Flynn kishte deklaruar fillimisht se nuk i kishte diskutuar sanksionet me ambasadorin rus në SHBA, Sergey Kislyak, por më pas u pohoi zyrtarëve të Shtëpisë së Bardhë se edhe mund t’i kishte diskutuar ato.
Një ditë më parë u raportua se Departamenti i Drejtësisë e kishte paralajmëruar prej javësh administratën e Trump-it se këto komunikime mund t’ia komprometonin atij pozitën.
Komunikimet i përkasin fundit të vitit të shkuar, kur Flynn nuk ishte emëruar ende në administratë.
Gjenerali Keith Kellogg mësohet se do ta kryejë përkohësisht këtë detyrë, deri në një emërim të ri. /tesheshi.com/
