Nëse Vladimir Putin dëshiron të kryejë sulme ajrore në Siri, ky nuk është një problem për kandidatin republikan për Shtëpinë e Bardhë, Donald Trump. Ai beson se lëvizjet ushtarake të Rusisë në Siri kanë për objektiv ISIS dhe se Shtetet e Bashkuara nuk duhet të ndërhyjnë.
“Ata nuk e respektojnë presidentin tonë. Ata vërtet që nuk na respektojnë më. Prandaj edhe po e bëjnë këtë”, komentoi Trump për CNN-in.
Komentet e Trump, një favorit në sondazhet presidenciale në SHBA, shkojnë edhe më tej. Ai mendon se Shtetet e Bashkuara nuk duhet të synojnë të jenë “polici i botës”.
“Kam dëgjuar se po i godasin të dyja palët”, tha ai, duke iu referuar forcave kundërshtare të regjimit të al Assad dhe militantëve të ISIS.
“Nëse Rusia dëshiron të luftojë, sidomos ISIS, le ta bëjë. Unë besoj se ata po luftojnë ISIS pasi nuk duan që t’I mbërrijë deri në shtëpi”, tha Trump.
Kandidati republikan është shprehur sërish kritik për refugjatët sirianë, duke theksuar se nëse zgjidhet në krye të Shtëpisë së Bardhë, do t’I kthejë pas të gjithë refugjatët që do pranojnë Shtetet e Bashkuara. /tesheshi.com/
