Shtetet e Bashkuara të Amerikës kanë ritheksuar qëndrimin se nuk duan të jenë më palë e betejës mes forcave kurde dhe turke në Siri.
Operacioni turk “Burimi e Paqes” që ka hyrë në ditën e tretë, ka bërë që raportet e mediave të flasin për një “etnocid” gjë që Turqia e mohon kategorikisht.
“Jam munduar ta shmang këtë konflikt që kurdët dhe Turqia e vijojnë prej tri dekadash, por tani është koha të tërhiqemi nga këto luftëra qesharake pa fund. Do luftojmë atje ku na intereson dhe vetëm për të fituar. Turqia, Evropa, Siria, Irani, Iraku, Rusia dhe kurdët duhet ta zgjidhin vetë situatën dhe si do veprojnë me luftëtarët e kapur të ISIS që kanë në lagjet e tyre”, reagoi presidenti amerikan Donald Trump në Twitter.
Bashkimi Evropian dhe kongresmenë republikanë në SHBA po vlerësojnë ndëshkimin e Turqisë me sanksione, pasi vendi sipas tyre po vepron si pushtues duke sulmuar edhe zonat e banuara me popullsi kurde. Por Turqia po garanton se civilët janë gjithsesi të kursyer.
Presidenti turk, Rexhep Taip Erdogan, pretendon se marrja nën kontroll e një korridori prej 30 kilometra në brendësi të Sirisë do mundësonte ngritjen e kampeve për refugjatë që tani strehohen nga Ankaraja. /tesheshi.com/
