Presidenti amerikan Donald Trump është akuzuar për islamofobi pasi foli për distancën sociale në xhami gjatë Ramazanit, muajit të agjërimit.
Trump tha të shtunën se “mund të ketë dallime” në mënyrën se si zyrtarët dhe politikanët do të imponojnë masa kufizuese gjatë muajit të pritshëm të Ramazanit, krahasuar me festat e fundit të Pashkëve.
Trump i bëri këto komente pas një tëeet-i nga shkrimtari konservator Paul Sperry, të cilit presidenti amerikan iu përgjigj.
“Ne do të shohim nëse zyrtarët imponojnë një masë të distancës sociale në xhami gjatë Ramazanit, siç bënë me kishat gjatë Pashkëve,” shkroi Sperry, duke komentuar mbi një temë që qarkullonte në qarqet e krahut të djathtë në Twitter.
“Unë do të thoja se mund të ketë dallime,” tha Trump në një konferencë të rregullt për shtyp.
“Ne do të shohim se çfarë ndodh. Sepse, unë shoh dallime të mëdha në këtë vend,” tha ai, i cili po kujtonte komentet e krahut të djathtë në Twitter.
Kur u pyet nëse ai mendonte se udhëheqësit fetarë muslimanë nuk do ta respektonin masën e distancës sociale gjatë Ramazanit, ai u përgjigj: “Jo, nuk dua ta them fare”.
“Kam pasur një bisedë me imamët, priftërinjtë, rabinët … kam pasur një bisedë të shkëlqyeshme me udhëheqësit fetarë,” shtoi ai.
“Unë jam dikush që beson në fe, nuk ka rëndësi se te cila, por politikanët tanë duket se i trajtojnë ndryshe besimet. Nuk e di se çfarë ndodhi me vendin tonë, por krishterimi trajtohet ndryshe nga më parë. Unë mendoj se është trajtuar shumë padrejtësisht,” tha Trump.
Pandemia pengoi të krishterët në të gjithë vendin të mblidheshin të Dielën e Pashkëve, 12 prill, megjithëse disa udhëheqës lehtësuan kufizimet.
Hebrenjtë u detyruan gjithashtu të shënonin Pesahun në shtëpi.
Komuniteti Islam i Amerikës së Veriut, së bashku me ekspertët mjekësorë muslimanë, kanë kërkuar ndërprerjen e lutjeve në grup dhe tubimeve të tjera në mes të një pandemie.
Ndërkohë në një Tweet, Këshilli për Marrëdhëniet Amerikano-Islamë i quajti komentet e Trump “të papërshtatshme” me hashtagun “Islamofobia”.
Nga ana tjetër, një firmë juridike muslimane tha se Trump përçon “urrejtje anti-muslimane”. /tesheshi.com/
