Kandidati republikan për garën presidenciale, Donald Trump duket se ka zbutur qëndrimin në lidhje me një propozim të mëhershëm të tij për t’u ndaluar përkohësisht muslimanëve hyrjen në SHBA.
Duke iu përgjigjur komenteve të kryebashkiakut të Londrës, Sadiq Khan, kandidati republikan tha se ndalimi i udhëtimit për muslimanët në SHBA ishte “thjesht një sugjerim”.
Khan më herët shprehu shqetësimin e tij se nuk do të ishte në gjendje të udhëtonte në SHBA në rastin e një presidence Trump, pikërisht për shkak të besimit të tij musliman. Khan refuzoi ofertën e Trump se për të do të bënte një përjashtim, duke thënë se pikëpamjet e biznesmenit njujorkez ishin “injorante” dhe do t’i bënin Britaninë e Madhe dhe Shtetet e Bashkuara më pak të sigurta.
Propozimi i kandatit Trump erdhi vitin e kaluar pas sulmeve të Parisit nga të cilat u vranë 130 persona.
Ky ndalim i propozuar është kritikuar gjerësisht në Shtetet e Bashkuara dhe jashtë tyre, por Trump deri më tani i kishte qëndruar propozimit të tij, duke thënë se ishte i nevojshëm për sigurinë e Shteteve të Bashkuara.
“Eshtë një ndalesë e përkohshme. Nuk është ende e konkretizuar”, tha Trump. “Ishte thjesht një sugjerim derisa sat ë zbulonin përse bëhj fjalë”. Trump ka ndryshuar kështu qëndrimin si për propozimin e tij, edhe për një varg çështjesh të tjera, ditëve të fundit.
Me gjasa nuk është rastësi që zbutja e qëndrimit të Donald Trump për retorikën antimuslimane të jetë e lidhur me një takim të afërt mes tij dhe kreut të Kongresit, Paul Ryan.
Trump ka marrë pothuajse kandidimin zyrtar të republikanëve për garën e Shtëpisë së Bardhë, por ende liderët e partisë nuk i kanë dhënë mbështetje. Në koment të propozimit të Trump për të ndaluar emigrantët muslimanë në SHBA, në atë kohë, kreu i Kongresit, Ryan dha një përgjigje të shkurtër e të ashpër. “Ky nuk është konservatorizëm”.
Në atë kohë, zëri i Ryan ishte një prej shumë republikanëve që e dënuan atë që dukej të ishte një propozim ekstrem kontrovers nga manjati njujorkez. Por tashmë që Trump është pothuajse kandidati zyrtar i republikanëve, mjedisi konservator po përpiqet të ketë një qasje në mbështetje të tij.
Por Ryan i ka mbetur besnik qëndrimit të tij, duke thënë se dëshiron prova se Trump ndan vlera konservatore dhe parimet konservatore. Ndryshimi i retorikës së Trump për muslimanët mund të ofrohet si një degë ulliri për kreun republikan të Kongresit dhe ndoshta, mund të shërbejë edhe si gjethe fiku që Ryan të ofrojë mbështetjen e tij për kandidatin.
Përgatiti: Juli Prifti – /tesheshi.com/
