Kandidati republikan për president të SHBA, Donald Trump ka deklaruar se vendet e prekura nga terrorizmi si Franca, do të mund t’i nënshtrohen një “kontrolli ekstrem të emigracionit”, si një prej masave të domosdoshme për parandalimin e sulmeve terroriste në SHBA.
I pyetur nga gazetari i rrjetit televiziv NBC nëse propozimi i tij mund të sjellë në situatë ku vetëm një numri të vogël të njerëzve do t’i lejohet hyrja në SHBA, Trump është përgjigjur: “Ndoshta edhe kjo mund të ndodhë. Duhet të jemi të mençur, të kujdesshëm dhe të fortë”, njofton agjencia AP.
Miliarderi amerikan para disa muajsh pati propozuar edhe ndalesën për hyrje të muslimanëve në SHBA, dhe po ashtu ka kritikuar administratën e presidentit Obama për shkak se akoma vazhdon të pranojë refugjatë nga Siria.
Trump, gjatë një adresimi para Konventës Kombëtare të Partisë Republikane të enjten, ka thënë se SHBA-të “duhet menjëherë të ndalin emigrimin nga çdo vend i cili është i kërcnuar nga terrorizmi derisa të mos futen masa më të rrepta kontrolli nëpër kufinj”, por nuk ka përmendur me emër muslimanët, Sirinë, Irakun apo vendet tjera të Lindjes së Afërt, njofton AP.
Gjatë intervistës për NBC, duke folur për problemet e Gjermanisë dhe të Francës me terrorizmin javët e fundit, Trump tha se “është faji i vetë këtyre shteteve, për shkak se kanë lejuar hyrjen këtyre njerëzve hyrjen në territorin e tyre”. /tesheshi.com/
