Presidenti amerikan Donald Trump dhe homologu i tij turk, Rexhep Tajip Erdogan, do të takohen më 21 shtator, njoftoi Shtëpia e Bardhë.
Takimi i dy presidentëve do të realizohet gjatë samitit të OKB-së, tha këshilltari për sigurinë kombëtare i presidentit Trump, H.R McMaster.
Zëdhënësi i presidencës së Turqisë, Ibrahim Kalin, gjithashtu njoftoi se Erdogan dhe Trump do të zhvillojnë një takim në samitin e Kombeve të Bashkuara.
Situata në Siri me gjasë do të jetë një temë diskutimi midis dy udhëheqësve, pasi politikat e SHBA-së në vendin e shkatërruar nga lufta janë bërë problemi më i madh midis dy aleatëve të NATO-s. Kjo sepse Shtetet e Bashkuara mbështesin Partinë e Bashkimit Demokratik (PYD), që është dega siriane e grupit terrorist të PKK-së, dhe krahun e tij të luftës (YPG).
Përveç kësaj, marrëdhëniet SHBA-Turqi janë tensionuar pas ngritjes së aktakuzës kundër stafit të sigurisë të Presidentit Erdogan, i cili e shoqëroi atë në një udhëtim në Uashington, duke dëmtuar lidhjet e ndërsjellta.
Gjatë vizitës së Erdoganit në SHBA në maj, mbështetësit e PKK-së shkaktuan një përleshje jashtë Ambasadës Turke në Uashington, DC.
Hetimi mbi një ish-ministër turk në Shtetet e Bashkuara, sipas të gjitha gjasave do të jetë një tjetër temë diskutimi, pasi Turqia pretendon se proçesi nuk është asgjë më shumë se vazhdim i operacionit të grupit terrorist të Gylenit (FETÖ) në dhjetor të vitit 2013 kundër qeverisë turke.
Ish ministri i ekonomisë Zafer Çağlayan u akuzua kohët e fundit nga një prokuror amerikan se “ka përdorur sistemin financiar amerikan për të kryer transaksione qindra milionë dollarëshe në emër të qeverisë së Iranit dhe entiteteve të tjera iraniane, të cilat u ndaluan nga sanksionet amerikane” midis 2010 dhe 2015. /tesheshi.com/
