Dy kandidatët për postin e presidentit në SHBA kanë debatuar në të parin ballafaqim të drejtpërdrejtë mes tyre para zgjedhjeve të nëntorit.
Donald Trump, kandidat i republikanëve, dhe Hillary Clinton, e cila përfaqëson demokratët në fushatë, kanë diskutuar mbi një sërë temash në një debat që mendohet të jetë ndjekur nga 100 milionë shikues.
Sa ka të bëjë me ekonominë, Clinton ka kërkuar taksa më të ulëta për shtresën e mesme, kurse Trump është përqendruar te rinegociimi i marrëveshjeve tregtare.
Ish-sekretarja amerikane e Shtetit e ka sulmuar kundërshtarin për mosdeklarimin e taksave. “Ka diçka që ai po fsheh,” ka thënë Clinton.
Sulm së cilit Trump i është përgjigjur duke thënë se do t’i deklaronte taksat kur Clinton t’i bënte të njohura 33 mijë e-mail-et e fshira.
“Ai e ka nisur vërtet aktivitetin politik mbështetur në gënjeshtrën raciste se presidenti ynë i parë me ngjyrë nuk ishte një qytetar amerikan. Nuk kishte absolutisht asnjë provë për këtë. Por ai këmbënguli. Ngulmoi vit pas viti,” do të thoshte Clinton për rivalin kur do ta kritikonte atë për vënin në dyshim të lindjes së Obama-s në SHBA.
Kandidati republikan, nga ana e tij, e përshkroi Hillary Clinton-in si një politikane që i kishte çuar dëm mundësitë për t’u dhënë zgjidhje çështjeve të brendshme dhe ndërkombëtare.
“Ajo ka përvojë, por është përvojë e keqe,” u shpreh Trump.
Lindja e Mesme dhe ISIS-i qenë po ashtu pjesë e debatit, me Clinton-in që pretendoi se, ndryshe kundërshtarit, ajo kishte një plan për ta luftuar ISIS-in.
Clinton e cilësoi si të papërshtatshëm Trump-in për komandant të përgjithshëm të vendit, duke e kritikuar në të njëjtën kohë për lëvdatat për Vladimir Putin-in.
Trump do të kundërpërgjigjej me pretendimin se Clinton nuk kishte temperamentin e duhur për të qenë presidente e SHBA-ve.
Në vazhdën e debateve të drejtpërdrejta, pasuesi do të jetë më 9 tetor, e tjetri më 19 tetor. /tesheshi.com/
