I shumëpërfoluri Donald Trump, më i diskutuari kandidat i republikanëve në garën paraprake presidenciale në SHBA, ka siguruar një tjetër fitore të çmuar në Florida. 46 për qind të votave shkuan për të, ndërsa humbja e detyroi rivalin Marco Rubio, që mori 27 për qind të votave, të dalë jashtë gare.
Miliarderi amerikan fitoi gjithashtu në Ilinois e në Karolinën e Veriut. Me 99 për qind të votave të numëruara, gara në Misuri ka rezultuar më e luftuara, me Trump-in që ka kryesuar me 40.8 për qind të votave ndaj 40.7 për qind të votave të Ted Cruz-it, rivalit tjetër republikan.
E vetmja goditje që ka marrë Trump ka qenë në Ohajo, ku fitues u deklarua guvernatori John Kasich.
Gjithsesi, shpresa e vetme për ndaljen e Trump-it mbetet te rivali Ted Cruz, senatori i Teksasit. Në Hjuston ai deklaroi se ishte i vetmi kandidat që mund ta sfidonte Trump-in. “Askush tjetër nuk ka mundësi matematike,” tha ai i bindur.
Te demokratët, Hillary Clinton ka triumfuar në Florida, në Karolinën e Veriut, në Ohajo dhe Ilinois.
Ish-sekretarja amerikane e Shtetit mban kryesimin në Misuri pas numërimit të 99 për qind të votave. 49.6 për qind të votave i përkasin asaj në këtë garë, teksa kundërshtari Bernie Sanders ka 49.4 për qind të tyre.
“Ne po i afrohemi sigurimit të kandidaturës së Partisë Demokratike dhe të fitimit të zgjedhjeve në nëntor,” u tha Clinton mbështetësve në Florida. /tesheshi.com/
