Këshilli për Marrëdhëniet Amerikano-Islame i ka bërë thirrje Donald Trump-it të kërkojë ndjesë për komentet e tij mbi Islamin.
Në deklaratën e drejtorit ekzekutiv të CAIR-it, Nihad Awad, thuhet se, “Retorika antimuslimane e Donald Trump-it nuk reflekton udhëheqje, por, në vend të kësaj, reflekton një mendësi sektare, që shërben për ta ndarë vendin tonë dhe botën.”
Ky këshill është i mendimit gjithashtu se retorika e Trump-it dhe e zyrtarëve të tjerë republikanë ka patur ndikim në nxitjen e incidenteve antimuslimane në të gjithë vendin gjatë muajve të fundit.
Trump-i do të shprehej në një intervistë dy ditë më parë se, “Mendoj se Islami na urren ne”. “Ka një urrejtje të jashtëzakonshme,” tha ai në programin e Anderson Cooper-it në CNN.
I pyetur në debatin e mbrëmshëm në Florida, mes kandidatëve republikanë për president të SHBA-ve, në e kishte patur fjalën për muslimanët në tërë botën në komentet e tij, Trump ka dhënë këtë përgjigje: “E kam fjalën për shumë prej tyre. I përmbahem saktësisht asaj çfarë thashë për Anderson Cooper-in.”
Donald Trump kryeson garën mes republikanëve për kandidaturën presidenciale, por shumë prej komenteve të tij kanë ngjallur polemika, posaçërisht ato në lidhje me muslimanët dhe Islamin. /tesheshi.com/
