Asnjë jetë amërikane dhe irakiane nuk ka humbur në sulmin e Iranit falë masave të marra dhe sistemit të paralajmërimit të hershëm, tha Presidenti i SHBA Donald Trump në fjalimin e tij të parë pasi Irani gjuajti me raketa ndaj bazave amerikane në Irak të mërkurën, duke shtuar se SHBA menjëherë do të vendosnin sanksione të reja të forta që do të qëndrojnë në fuqi derisa Teherani të ndryshojë sjelljen.
“Asnjë amerikan nuk është lënduar në sulmin nga regjimi iranian, të gjithë ushtarët tanë janë të sigurt dhe vetëm një sasi e vogël dëmesh është shkaktuar në bazat tona ushtarake”, tha Trump.
Sipas tij, forcat amerikane janë të gatshme për çdo gjë, por tani për tani Irani duket se po tërhiqet.
“Irani duket se po tërhiqet, gjë që është e mirë për të gjitha palët dhe një gjë shumë e mirë për botën”, tha Trump.
Ai shtoi se “Irani është sponsori kryesor i terrorizmit” dhe “përpjekjet e tij për të prodhuar armë bërthamore janë një kërcënim për botën e civilizuar”.
Duke folur për vrasjen e gjeneralit iranian Qassem Soleimani, Trump tha se SHBA “eliminoi terroristin më të madh në botë”, i cili shtoi se ishte personalisht përgjegjës për disa nga krimet më të rënda, pasi sipas tij, ai ndër të tjera, nxiti luftëra të përgjakshme në rajon dhe vrau shumë ushtarë amerikanë.
“Ai duhet të ishte eliminuar shumë kohë më parë dhe ky është një mesazh të fuqishëm për terroristët”, theksoi Trump.
Presidenti amerikan shtoi se Irani duhet të braktisë ambiciet e tij bërthamore dhe t’i japë fund mbështetjes së tij për terrorizmin.
“Ka ardhur koha që Gjermania, Mbretëria e Bashkuar, Franca, Kina dhe Rusia ta njohin këtë realitet dhe duhet të largohen nga marrëveshja bërthamore,” tha presidenti amerikan, duke shtuar se bota duhet të ketë një marrëveshje të re me Iranin. /tesheshi.com/
