Presidenti amerikan Donald Trump tha të mërkurën se asnjë palestinez nuk do të dëbohet nga Rripi i Gazës i rrethuar, edhe pse ai vazhdon të synojë planin e tij për të marrë nën kontroll enklavën bregdetare.
“Askush nuk do t’i dëbojë palestinezët,” tha Trump në përgjigje të pyetjes së një gazetari teksa priste liderin irlandez Michael Martin në Zyrën Ovale.
Deklaratat e presidentit vijnë pasi ministri i Financave i ekstremit të djathtë të Izraelit, Bezalel Smotrich tha të dielën se Tel Avivi do të hapë një zyrë të re “Administrata e Deportimit” brenda Ministrisë së Mbrojtjes për të menaxhuar zhvendosjen e detyruar të palestinezëve nga Gaza, sipas raporteve të shumta të mediave. Ai tha se ky plan ka mbështetjen e administratës Trump.
“Zyrtarë të ndryshëm të administratës më kanë thënë vazhdimisht: ‘Ne nuk do të lejojmë dy milionë nazistë të jetojnë menjëherë pas gardhit’,” tha ai, duke iu referuar palestinezëve në Gaza. “Ka qenë tabu jo shumë kohë më parë të flitej për njerëzit që largoheshin nga Gaza, por tani ata që ishin të çmendur janë më realistët.”
“Nuk është vetëm realist, është i vetmi plan që është realist”, shtoi ai, sipas Washington Post.
Ministri, i cili madje ka mohuar vetë ekzistencën e popullit palestinez, tha se Tel Avivi po punon me administratën amerikane për të përcaktuar se cilat vende do të marrin ata që janë zhvendosur me forcë nga Gaza.
Ky propozim jashtëzakonisht i diskutueshëm vjen pasi Trump propozoi në shkurt që të merrte Gazën, të largonte palestinezët nga shtëpitë e tyre dhe t’i zhvendoste diku tjetër. Plani është pritur me kritika të ashpra në mbarë botën, me shumë vende që e dënojnë atë si një formë spastrimi etnik. /tesheshi.com/
