Nuk pritej kurrë që gara të ishte kaq e ngushtë. Nga njëra anë, Hillary Clinton, një politikane e maturuar dhe një nga forcat më të pushtetshme në partinë e saj, e nga ana tjetër, Donald Trump, që nuk ka aspak eksperiencë në detyrë dhe nuk pëlqehet nga pjesa më e madhe e “kokave” të mëdha republikane. Rezultatet e një gare kaq jo të përpjesshme, duhet të ishin të qarta, por, megjithatë si tregojnë sondazhet, gara presidenciale mbeti e ngushtë deri në momentin e votimit.
Më herët, kryesimi i Clinton mbi Trump u rrudh nga shtatë pikë përqindjeje në vetëm tre. Tregjet e basteve tashmë i japin Trump një shans një në pesë për të fituar zgjedhjet, ndërsa FiveThirtyEight, një mekanizëm gazetaresk të dhënash, e vendos mundësinë e tij në më shumë se një në katër. Investitorët presin me padurim. Treguesi i pasigurisë në bursat amerikane është në nivelin më të lartë që prej qershorit, kur Britania votoi të largohet nga Bashkimi Europian.
Cilindo që Amerika të vendosë të zgjedhë, do të ketë ndikim madhor politik për të gjithë botën. Ekspertët që nga ishujt Fixhi e deri në Francë po grinden për rezultatet, por çfarë do të ndodhte nëse vendet e tjera do të votonin?
YouGov, kompani sondazhesh kreu një vëzhgim në 19 kombe të ndryshme, duke pyetur njerëzit se kë do të kishin dashur të votonin për president të ardhshëm të Shteteve të Bashkuara: Trump apo Clinton?
Ashtu si edhe gjalpi i kikirikëve dhe sanduiçet me xhelatinë, apeli i Trump duket se kufizohet vetëm në Amerikë. Ai do të fitonte më pak se 25 për qind të votave në të gjitha vendet e tjera që u vëzhguan. Pavarësisht pretendimit të tij të fundit se ai “është fans i madh i hinduve dhe Indisë”, admirimi i tij nuk gjen reciprocitet: vetëm 20 për qind e indianëve do të votonin për të. Numrat e tij në sondazh gjetkë, janë edhe më të habitshëm. Kandidati republikan kap dashamirësinë e 12 për qind të votuesve në Vietnam dhe 9 për qind të atyre në Malajzi. Në Danimarkë, më pak se 4 për qind e të anketuarve thanë se do ta zgjidhnin Trump në krahasim me Clinton.
Ngjitja e Trump mund të ketë paralele atë të partive populiste në Europë. Të dhënat e YouGov tregojnë se ai del mirë në sondazhe mes mbështetësve të partive të ekstremit të djathtë si Fronti Nacional në Francë dhe Demokratët Suedezë.
Ndërsa pjesa më e madhe e botës duket se e ka zemrën të mbyllur për të, Trump duhet ta bëjë gjumin e qetë kur të mësojë se të paktën, ka fituar admirimin e të paktën një grupi të huajsh: partisë së Britanisë së Pavarur UKIP. Mbështetësit e tyre preferojnë manjatin kontrovers me 43 për qind. Nuk është shumë e habitshme që Nigel Farage, lideri sporadik i tyre, dhe Trump janë në marrëdhënie kaq të rehatshme. Trump e ka ftuar homologun britanik për të folur në tubimet e tij dhe duket se ka pasur një farë frymëzimi nga vota e Britanisë për t’u larguar nga BE. Sipas vetë rrëfimeve të tij, një fitore e Trump do të ishte si “Brexit shumëzuar me pesë”.
Përgatiti: Juli Prifti- /tesheshi.com/
