Presidenti amerikan, Donald Trump apeloi Rusinë të ndalë “destabilizimin” e Ukrainës dhe vendeve të tjera dhe t’i japë fund mbështetjes për “regjime armiqësore” si ato në Siri dhe Iran. Duke folur nga kryeqyteti polak, Varshava, Trump i kërkoi Rusisë të “bashkohet me komunitetin e kombeve të përgjegjshme”.
Lideri amerikan pas fjalimit në Varshavë udhëtoi drejt Hamburgut për samitin e G20 ku takon edhe presidentin Putin, për herë të parë.
Trump iu referua sjelljes “destabilizuese” të Rusisë dy herë gjatë qëndrimit në Poloni. Por, zëdhënësi i Kremlinit nuk ka komentuar gjatë për to, duke thënë thjesht se “Moska nuk bie dakord”. Bëhet fjalë, thonë analistët, për një qasje të presim-e-të-shohim. Rusia më herët ka pasur shpresa të mëdha se Donald Trump do të shpëtonte marrëdhëniet mes dy shteteve nga pika më e ulët që ato arritën pas aneksimit të Krimesë. /tesheshi.com/
