Përfundimisht, ish-kryeministri më jetëgjatë japonez, Shinzo Abe i është prerë jeta në mes pasi u qëllua teksa po mbante një fjalim fushate. Ai u shua në kushte spitalore në një përpjekje për ta mbajtur në jetë.
Më herët, kryeministri japonez Fumio Kishida tha se paraardhësi i tij ishte në një “gjendje shumë të rëndë”. Mediat japoneze raportuan se politikani veteran u dërgua me urgjencë në Njësinë e Kujdesit Intensiv dhe iu nënshtrua një transfuzioni.
Vrasja gjakftohtë e liderit më jetëgjatë të vendit ndodhi në mes të ditës në një vend me një nga ligjet më të rrepta në botë ndaj armëve.
Ngjarja ndodhi në një tubim fushate në qytetin Nara, afër Osakës në Japoninë perëndimore.
Dy të shtëna u qëlluan në drejtim të Abe, dhe gjuajtja e dytë e goditi atë në shpinë, duke bërë që ai të rrëzohej në tokë.
Ish-kryeministri japonez po shtrëngonte gjoksin teksa ra në tokë dhe në këmishën e tij dukej një gjurmë gjaku.
Sulmuesi, një 41 vjeçar, u arrestua menjëherë pas të shtënave dhe as që tentoi të arratisej.
Abe ishte kryeministri më jetëgjatë i Japonisë. Ai dha dorëheqjen në vitin 2020 për arsye shëndetësore. Më vonë ai zbuloi se vuante nga një sëmundje e rëndë e zorrëve. /tesheshi.com/
