Është larguar në mënyrë të mistershme kryeprokurori amerikan i Gjykatës Speciale të Kosovës.
David Schwendiman, ka bërë të ditur me anë të një deklarate të posaçme se ai e mbyll mandatin më 31 mars 2018, pasi qeveria e SHBA nuk e lejon të punojë pas kësaj date.
Sipas deklaratës, zyrtarisht shkaku është mbushja e moshës së pensionit, por ende nuk dihet se kush të emërohet si kreu i institucionit që do të merret me hetimin e ish-komandantëve të UÇK-së.
“Kjo duhet të ndodhë sepse administrata amerikane nuk mund të bëjë përjashtim për statusin tim si pensionist i rimarrë në shërbim, diçka që ligji nuk më lejon të ndryshoj, pavarësisht nga sa shumë mund të dëshiroj të qëndroj”, tha Schwendiman në deklaratën për shtyp.
Ai më tej e bëri të qartë që nuk po e jep dorëheqje as nuk po shkarkohet dhe që largimi i tij i shpejtë nuk paraqet një ndryshim në politika ose zotim ndaj punës së Zyrës së Prokurorit të Specializuar nga ana e SHBA-së, ose nga ana e Bashkimit Evropian apo bashkësia ndërkombëtare në përgjithësi.
“Përkundrazi, shpejtësia me të cilën Bashkimi Evropian ka reaguar për ta filluar kërkimin për Prokurorin e Specializuar të ri tregon fuqinë e përkrahjes së tij – po ashtu si përgjigja e gjithanshme vetëm disa javë më parë ndaj përpjekjes për ta shfuqizuar ligjin i cili kishte krijuar Dhomat e Specializuara dhe Zyrën e Prokurorit të Specializuar tregoi vendosmërinë ndërkombëtare dhe mbështetjen për ne,” tha ai.
Schwendiman u rrek të siguronte opinionin se largimi i tij nuk do të ndalojë angazhimin e SHBA-së dhe BE-së për të çuar përpara punën e Gjykatës Speciale.
“Detyra ime si Prokurori i Specializuar është që t’i caktojë politikat, ta drejtoj punën dhe të sigurojë që ata që bëjnë punën kanë burimet dhe mbështetjen që u duhen që ta kryejnë punën,” tha prokurori amerikan.
Postin e Kryeprokurorit, deri sa të zgjidhet zyrtari i ri do ta mbajë Kwai Hong Ip, i cili ka qenë prokuror i Gjykatës së Hagës për Srebrenicën dhe më pas kreu i Task Forcës së BE-së për raportin e Dick Marty-t.
Schwendiman dha një mesazh në lidhje me hetimet të cilat ai kryeson.
“Asnjëri nga ata përgjegjës për krimet e përfshira në mandatin e Zyrës së Prokurorit të Specializuar dhe të Dhomave të Specializuara nuk duhet të mendojë për asnjë moment që largimi im ka të bëjë fare me një mungesë zotimi ndaj hetimeve.
Një parim kryesor i punës sonë gjithmonë ka qenë përgjegjësia individuale – duke mbajtur njerëz përgjegjës për veprat e veta, për çka kanë bërë si individë – puna jonë asnjëherë nuk ka qenë për ndryshimin e historisë ose për të veçuar grupe të caktuara për dënim.
“As kjo nuk do të ndryshohet kur një Prokuror i Specializuar i ri do të marrë përsipër detyrën”, tha ai.
Schwendiman u emërua Prokuror i Specializuar më shtator 2016, pasi që kishte shërbyer si Kryeprokuror i Task Forcës Hetimore Speciale që nga maj 2015.
Ai doli në pension nga Departamenti Amerikan i Drejtësisë më 2014 pasi kishte shërbyer në pozita të ndryshme në departamentin, duke përfshirë Këshilltar të Lartë për Çështje Gjyqësore, Ndihmësprokurorin e Parë të Shteteve të Bashkuara dhe Prokurorin e Përkohshëm për rajonin e Utahut.
Në karrierën e tij që zgjatet më shumë se pesë dekada, ai kreu detyra në Bahrejn, Bangladesh, Brazil, Tajlandë, Vietnam, dhe kaloi shumë vite në Afganistan dhe Bosnjë e Hercegovinë.
Kwai Hong Ip nuk ka ndonjë profil publik të publikuar, madje as në faqen zyrtare të Gjykatës së Hagës dhe Gjykatës Speciale. Mungon edhe fotografia e tij.
Ngaqë gjithmonë ka ndjekur hetimet në terren, ai ka ndjekur një profil të ulët jo-publik. /tesheshi.com/
