Në kulmin e krizës pandemike, Kanadaja është tronditur nga një plojë e përgjakshme shkaktuar nga një njeri i vetëm, i cili u morri jetën, ende pa arsye të ditura, plot 16 njerëzve.
Ngjarja e rëndë ndodhi në Nova Scotia, ku raportohet se trupat u gjetën vende-vende
Mediat dhe autoritetet vendase thonë se ky është sulmi më i rëndë në 30 vitet e fundit në Kanada.
Midis të jetëve të humbura është një oficere policie. Disa trupa u gjetën brenda dhe para një shtëpie në qytetin e vogël e rural Portapique, 100 kilometra në veri të Halifax dhe policia tha se aty ka qenë skena e parë e asaj çfarë ka ndodhur.
“Ky është një nga aktet më të egra të dhunës në historinë e provincës sonë,” tha kryeministri i Nova Scotia, Stephen McNeil.
Policia ka identifikuar autorin, Gabriel Wortman, 51-vjeç, i cili besohet se ka jetuar në Portapique për një kohë.
Autoritetet thonë se ai kishte veshur një uniformë policie në një moment në sulm, dhe se e kishte sajuar makinën që të dukej si një automjet RCMP (strukturë policore).
Autoritetet gjithashtu thonë se ai me qëllim i veçoi viktimat e para dhe pastaj i vrau ato në mënyrë të rastësishme. Policia fillimisht njoftoi se ajo kishte arrestuar Wortmanin në një pikë karburanti në Entfield, jo larg Halifaxit, dhe më pas njoftoi se ai kishte vdekur.
Nuk është e qartë se si ai vdiq dhe as nuk u shpjegua më vonë.
Brien, një zëdhënës i RCMP, tha që nuk ishte e sigurt që numri i të vdekurve do të vazhdojë të rritet.
Policia nuk ka lëshuar një motiv për sulmin, ndërkohë që u tha se shumë nga viktimat nuk e njihnin sulmuesin.
“Fakti që ky person kishte veshur një uniformë dhe një automjet policor në një moment sigurisht tregon që ky nuk ishte një veprim i rastësishëm,” tha një autoritet policor, duke shtuar se policia beson se Wortman vepronte vetëm.
Ai deklaroi se në një moment ka pasur një shkëmbim zjarri midis të dyshuarit dhe policisë.
Të shtënat masive janë relativisht të rralla në Kanada. Ky shtet ndryshoi ligjet e tij për kontrollin e armëve në 1989 pas rastit të rëndë të Marc Lepine, i cili vrau 14 gra, dhe më pas veten, në Kolegjin Ecole Polytechnique në Montreal.
Ligji ndalon mbajtjen e armës pa licencë, si dhe çdo armë automatike në Kanada. Blerja e një arme kërkon trajnim të detyrueshëm, vlerësimin e rrezikut të një personi, garanci të dy personave, pëlqimin e bashkëshortëve dhe një kontroll penal. /tesheshi.com/
