Kanë kaluar vetëm pesë ditë nga gara e Abu Dhabit, aty ku gjermani Nico Rosberg u shpall për herë të parë kampion bote në Formula 1, dhe sot ai ka lajmëruar tërheqjen.
Një lajm tronditës, befasues, për të gjithë ndjekësit e garave të shpejtësisë, për vetë Formulën 1. Askush nuk e ka pritur një vendim të tillë, madje nuk ka patur qoftë dhe një shenjë më të vogël të diçkaje të tillë.
“E kam ngjitur malin tim, jam në majë, prandaj kjo ngjan e drejtë”, ka deklaruar 31-vjeçari kampion bote.
“Për 25 vite në garim, ka qenë ëndrra ime të bëhem kampion bote i Formulës 1. Përmes punës së madhe, dhimbjes, sakrificave, ky ka qenë objektivi im. Dhe tani unë e kam arritur atë,” është shprehur Nico Rosberg.
Plotësisht befasues e ka cilësuar lajmin dhe drejtuesi i Mercedes-it, Toto Wolff.
“Ky është një vendim i guximshëm nga Nico… Qartësia e gjykimit të tij do të thotë se e pranova menjëherë kur ai ma tha.”
Rosberg e bëri debutimin në Formula 1 në vitin 2006, në garën e Bahrejnit, për t’i dhënë fund karrierës me fitimin e titullit pak ditë më parë. Ai qe pjesëmarrës në 206 gara, duke fituar 23 prej tyre, e duke u ngjitur 57 herë në podium. /tesheshi.com/
