Pas një pauze disi të gjatë, rikthehen ndeshjet e Champions League-s. Gjashtëmbëdhjetë skuadra do të jenë sonte në fushë, për të luajtur ndeshjet e treta në grupe.
Tetë janë sfidat e kësaj të marte, që u përkasin grupeve E, F, G dhe H.
Dy përballjet e grupit E do të jenë CSKA e Moskës – Monako dhe Bajer Leverkusen – Totenhem. Grupin e kryeson aktualisht Monako, me 4 pikë.
Sporting i Lisbonës – Borusia e Dortmundit dhe Real i Madridit – Legia e Varshavës janë takimet e grupit F.
Në “Santiago Bernabeu” priten gola të shumtë, me polakët e Legias që e kanë pësuar keq një muaj më parë në fushën e tyre nga Borusia. Në Portugali, Sportingu ka rastin më të mirë për të pretenduar kualifikimin për më tej.
Për grupin G kemi takimet Lestër Siti – Kopenhagen dhe Bryzh – Porto. Kampionët e Anglisë kanë gjashtë pikë të plota, dhe një trepikësh sonte do t’i bënte ata thuajse të kualifikuar që në gjysmë të rrugës.
Dhe në grupin H takohen Dinamo e Zagrebit – Sevilja dhe Lion – Juventus. Një grup i barazpeshuar, ku përjashtim bëjnë vetëm kroatët e Dinamos, që nuk kanë asnjë pikë deri tani.
Të gjitha takimet nisin në 20:45. /tesheshi.com/
