Champions League hyn në fazën e saj më të nxehtë, me pak ndeshje deri në finalen. Ndeshjet e para të çerekfinaleve shënojnë startin drejt fundit të aktivitetit për këtë sezon.
Dy prej takimeve të para çerekfinaleve do të luhen sonte. Edhe pse Bajern i Mynihut – Benfika është një sfidë e rëndësishme, e tërë vëmendja është përqendruar në përballjen spanjolle, ku të vëna karshi janë Barcelona dhe Atletiko e Madridit.
Ndeshja e sotme është përsëritur para dy vitesh në të njëjtën fazë të Champions League-s, ku Atletiko doli e fituar pas barazimit 1-1 në sfidën e parë e pas fitores 1-0 në të dytën.
Barcelona vjen pas humbjes të shtunën në “Camp Nou” ndaj Realit të Madridit, ndërsa, ndryshe saj, Atletiko fitoi thellë në fundjavë ndaj Real Betisit.
Katalanasit kryesojnë kampionatin spanjoll, kurse kundërshtarët e tyre në mbrëmjen e kësaj të marte pozicionohen mbas tyre, duke e bërë të jashtëzakonshme përplasjen pas pak orëve.
Të mërkurën do të luhen dy çerekfinalet e tjera, Volfsburg – Real i Madridit dhe PSG – Mançester Siti.
Takimet e kthimit do të jenë pas një jave. /tesheshi.com/
