Pas së keqes vjen e mira, ashtu siç për kampionët e Francës ka mbërritur një trofe në më pak se një muaj pas një humbjeje shkatërruese në Champions League nga Barcelona.
PSG-ja ka fituar mbrëmë për të katërtin vit me radhë Kupën e Ligës, një prej aktiviteteve kryesore të futbollit francez. Fitorja bëhet më domethënëse ngase ajo u arrit ndaj një rivali si Monako, që kryeson dhe kampionatin.
Ky ishte dhe trofeu i parë për teknikun Unai Emery, i ardhur këtë sezon te skuadra pariziene dhe i kryqëzuar që prej mbrëmjes së 8 marsit pas asaj humbjeje katastofike ndaj katalanasve.
Kryeqytetasit do ta mbizotëronin tërë lojën mbrëmë në “Stade des Lumieres” të Lionit. Gjermani Draxler do të realizonte që në minutën e katërt; një gol që fare mirë mund të ishte anuluar për pozicion jashtë loje.
Monako vuajti mungesën e Falcao-s, por e gjeti sidoqoftë golin e barazimit në minutën e 27-të. Për të shënoi Lemar. Megjithatë, nuk qe e thënë që në pushim të shkohej me rezultatin në barazpeshë, pasi Di Maria e kalon përsëri PSG-në në epërsi në mbarim të pjesës së parë.
Edinson Cavani u shpërblye për atë çka bëri në fushë me dy gola të realizuar në pjesën e dytë, duke vulosur përfundimisht fitoren 1-4 për PSG-në. /tesheshi.com/
