Kongresmenja demokrate Rashida Tlaib mundi kundërshtarin e saj republikan në zgjedhjet për distriktin e 12-të të Kongresit të Miçiganit, duke siguruar mandatin e saj të katërt si gruaja e vetme palestinezo-amerikane në Kongresin amerikan.
Gara u shpall me 18 për qind të votave të numëruara, me Tlaib që siguroi 77 për qind të votave, ndërsa kundërshtari i saj, James Hooper i Partisë Republikane, fitoi vetëm 19 për qind.
Fitorja e saj vjen në kontekstin e luftës së Izraelit kundër Gazës, e cila deri më tani ka marrë jetën e më shumë se 43,000 palestinezëve, luftë e cila është mbështetur nga presidenti Joe Biden dhe zëvendëspresidentja Kamala Harris, diplomatikisht dhe ushtarakisht, për më shumë se një vit.
Tlaib ka qenë një kritik i zëshëm i luftës, duke u bërë thirrje Shteteve të Bashkuara të ndalojnë dërgesat e armëve në Izrael. Kundërshtimi i saj ndaj luftës në Gaza dhe mbështetja për protestat pro-palestineze në universitete tërhoqi kritika të ashpra nga demokratët dhe republikanët.
Në ditët para zgjedhjeve të nëntorit, Tlaib refuzoi të mbështeste Kamala Harris për presidente të SHBA-së, megjithëse ajo u kërkoi qytetarëve amerikanë të dilnin dhe të votonin.
Në qershor 2023, Prokurori i Përgjithshëm i Miçiganit, Dana Nessel, akuzoi Tlaib për antisemitizëm, duke pretenduar se kjo kongresmene palestinezo-amerikane tha se Nessel kishte në shënjestër aktivistët pro-palestinezë në Universitetin e Miçiganit sepse ata ishin hebrenj. Tlaib nuk bëri asnjëherë komente të tilla, ndërsa media dhe burime të ndryshme më vonë e mohuan dhe e hodhën poshtë këtë pretendim.
Tlaib u zgjodh për herë të parë në Dhomën e Përfaqësuesve në vitin 2018 dhe shpejt u bë një emër i njohur në skenën politike kombëtare, si një nga dy gratë e para muslimane në Kongres. Ajo ka qenë një kritike e zëshme e Presidentit Donald Trump gjatë mandatit të tij dhe shpesh ka qenë objekt i sulmeve, duke përfshirë sulme nga vetë presidenti.
Që nga fillimi i luftës së Izraelit kundër Gazës në tetor 2023, Tlaib ka qenë kritike ndaj mbështetjes së SHBA-së për luftën, duke shkaktuar zemërim nga kolegët e saj në të dy anët e spektrit politik. /tesheshi.com/
