Bundesliga mbetet ende pronë e Bajernit të Mynihut, që nuk njeh rivalë prej pesë sezonesh. Pesë trofe të njëpasnjëshëm, mbizotërim i plotë i futbollit gjerman.
Bajerni i Mynihut do ta niste këtë sezon në Bundeligë me një fitore 6-0 ndaj Verder Bremenit më 26 gusht, për t’u shpallur kampionat një ditë më parë, tre javë para mbarimit të kampionatit, me një fitore 0-6 ndaj Volfsburgut.
Bavarezët mbyllën një vit më parë një përvojë me Pep Guardiola-n, për të vënë në drejtim Carlo Ancelotti-n. Zëvendësuan një spanjoll me një italian, një teknik fitues me një tjetër po aq fitues.
Statistikat flasin veç për Bajernin në Bundesligë: 22 fitore gjer tani, më shumë se çdo skuadër tjetër, e vetëm dy humbje, më pak se çdo skuadër tjetër. Rekord me 79 gola të shënuar, e 17 të pësuar: golavarazhi +62! Borusia e Dortmundit i afrohet paksa, me një golavarazh +30. Sulmuesi kryesor i Bajernit, Lewandowski, është dhe golashënuesi më i mirë, me 28 gola të shënuar kur kampionati do ende tre javë të mbarojë.
Eliminimi në Champions League, në Kupën e Gjermaninë, kanë lënë sigurisht shije të hidhur, por siç është shprehur Karl-Heinz Rummenigge, një prej figurave qendrore drejtuese të bavarezëve, kampionati është titulli më i rëndësishëm.
Carlo Ancelotti u bë trajneri i parë që e ka fituar titullin në katër kampionate të ndryshme në Europë: me Milanin, me Çelsin, me Paris Sent-Zhërmenin, e tani me Bajernin e Mynihut.
“Ky sezon i Bundesligës ishte një përvojë fantastike. Do të doja të falënderoja këtë klub fantastik. Jam me fat që ndodhem këtu me këta lojtarë të mëdhenj e me këta tifozë, që na kanë mbështetur gjatë gjithë sezonit në mënyrë aq fantastike. E merituam titullin, luajtëm futboll të bukur, Tani është koha të festojmë!”
Janë pikërisht fjalët e Ancelotti-t, italianit që e çoi Bajernin e Mynihut drejt një triumfi tjetër në Bundesligë. /tesheshi.com/
