Presidenti iranian Massoud Pezeshkian tha se vendi i tij është në kushte të vështira ekonomike dhe se njerëzit janë të pakënaqur, transmeton Anadolu.
“Ky është faji ynë, jo i Amerikës apo i të huajve”, tha Pezeshkian gjatë një fjalimi në hapjen e seancave publike parlamentare, ku do të diskutohen kualifikimet e 19 kandidatëve për ministra që ai propozoi për kabinetin e tij.
Duke thënë se kabineti që ai paraqiti në parlament ishte një “qeveri e unitetit kombëtar”, Pezeshkian premtoi se qeveria e tij do të mbronte të drejtat e njerëzve.
“Sot është një mundësi për të dëgjuar zërin e të gjithë anëtarëve të kombit dhe dëshirat e tyre për transformim dhe ndryshim. Vendi është në kushte të vështira dhe njerëzit janë në gjendje të vështirë ekonomike. Padrejtësia dhe pabarazia në sektorin ekonomik, social, mjedisor, arsimor dhe kulturor prek të gjithë”, tha Pezeshkian.
Ai theksoi se është detyrë e qeverisë që të veprojë me drejtësi, pra t’i kënaqë njerëzit.
“Qëllimi ynë është që populli të jetë i kënaqur me ne, por sot nuk është i kënaqur me ne. Nëse njerëzit janë të pakënaqur, kjo do të thotë të luftosh kundër Zotit. Fajin e kemi ne, jo Amerika apo të huajt”, tha Pezeshkian.
Duke folur për kërcënimet ndaj Iranit, ai tha:
“Amerika është në ballë të këtyre kërcënimeve. Amerika po vendos sanksione, por ne mund t’i eliminojmë këto kërcënime nëse bashkohemi. Ka tension dhe luftë në rajon, po derdhet gjak. Marrëdhëniet tona me fqinjët tanë janë të dobëta, kapitali ynë shoqëror është zvogëluar, integriteti ynë i brendshëm është dobësuar si dhe reputacioni i qeverisë në sytë e kombit. Këto janë dobësitë tona.”
Ai ka thënë se do të vazhdojë fuqishëm luftën kundër korrupsionit.
“Ne kemi ardhur për t’i shërbyer këtij kombi, jo për të sunduar. Shteti duhet të jetë mjet shërbimi, përndryshe është i parëndësishëm dhe i pavlerë”, theksoi Pezeshkian.
