Ish-kreu i Rendit, pak orë pasi Prokuroria e Krimeve të Rënda kërkoi heqjen e imunitetit të deputetit ndaj tij, afërmendsh për ta arrestuar, është mjaftuar vetëm me një fjali, të shumënjohurën “s’keni parë gjë akoma”, thënë në dalje e sipër nga banesa e tij.
Nga ana tjetër, kryeminstri Edi Rama ka lëshuar një sinjal se ai i beson ish-vartësit të tij në qeveri. Me anë të një statusi të orëve të fundit në FB, Rama shkruan se beson që drejtësia do e nxjerr në shesh të vërtetën, pikërisht ajo që ai thotë se e do këmbëngulësisht.
”Kur them dua një vend me drejtësi kuptoj vetëm drejtësi! Kur them dua të vërtetën nga drejtësia s’e bëj si ata që veç janë tallur dhe tallen me drejtësinë, edhe sot që flasim, prej 27 vjetësh rresht! E besoj këtë fjalë megjithë mend dhe luftoj për kuptimin e plotë të kësaj fjale, megjithë zemër. Drejtësi për të gjithë dhe drejtësi mbi këdo.
Uroj që Saimiri të provojë deri në fund që s’ka lidhje me këtë histori kriminelësh. Por këtë dua ta mësoj nga drita e së vërtetës dhe këtë dritë s’e kam as unë, as qeveria, as partia. E ka vetëm drejtësia që duhet të na e ndriçojë këtë udhëkryq mes llafeve e provave. Deri në fund”, shprehet Rama në statusin e tij. /tesheshi.com/
