Regjisori i njohur amerikan Oliver Stone tha në një intervistë për televizionin rus se ai ishte vaksinuar kundër koronavirusit me vaksinën ruse Sputnik V. Ai mori dozën e parë disa ditë më parë, dhe për të dytën do të kthehet në Rusi, sipas afatit të vaksinimit.
“Kam dëgjuar gjëra të mira në lidhje me vaksinën ruse, shpresoj se do të funksionojë. Eshtë një vaksinë e mirë, nuk e di pse injorohet në Perëndim”, tha ai.
Stone është 74 vjeç dhe është vaksinuar, megjithëse vaksina ruse nuk rekomandohet për njerëzit më të moshuar se 60 vjeç, pasi nuk është testuar mjaftueshëm mes njerëzve në atë grup moshë.
Në Rusi, vaksina Sputnik V aktualisht shpërndahet në profesione me rrezik të lartë, por vetëm tek njerëzit midis moshës 18 dhe 60 vjeç, shkruan Independent.
Stone ka një karrierë të pasur filmike gjatë së cilës ai fitoi tre Oskar.
Por në vitet e fundit, ai ka shkaktuar polemikë në Shtetet e Bashkuara për qëndrimin e tij pro-Kremlinit dhe lavdërimet e shumta për Presidentin rus Vladimir Putin, të cilin ai e konsideron si paqebërës botëror. /tesheshi.com/
