![Një ushtar izraelit qëndron me kompleksin e Xhamisë Al-Aksa në sfond [Dosje: Maya Alleruzzo/AP Photo]](https://tesheshi.com/wp-content/uploads/2024/12/Kolonet-izraelite-shkelin-status-quo-ne-ne-kompleksin-e-xhamise-Al-Aksa-360x180.webp)
Nga Mensur Krasniqi
Shtetit maqedonas mund t’i ikin 15 milion euro, kjo vetëm prej trilleve politike të ish-kryeministrit Nikolla Gruevski, që sigurisht ende vijon të jetë në pushtet dhe “të bëjë ligjin” në politikën e ditës.
Këshilli Shtetëror Zgjedhor duhet të shpenzojë 7.5 milion euro për organizimin e zgjedhjeve të afërta të 5 qershorit, por të cilat rrezikojnë të jenë më të çuditshmet në historinë politike moderne, njerësh dhe pa asnjë vlerë, pasi në to do të marrë pjesë vetëm një parti, dhe pikërisht ajo e Gruevskit.
Sepse, pothuajse të gjitha forcat e tjera politike, parlamentare ose jo, e kanë bërë të qartë se nuk do marrin pjesë në këto zgjedhje, e qartësuar kjo dhe nga mosdorëzimi në afatin e paraparë të listave me kandidatët për deputetë në KSHZ.
Por meseleja nuk mbarron këtu, pasi Gruevksi ka bërë me dije se pas zgjedhjeve të 5 qershorit, pra atyre që “do luhen me një portë”, do thërrasë të tjera zgjedhje, siç ka thënë ai, “për t`u dhënë shansin qytetarëve që të zgjedhin”.
Që do të thotë se brenda një periudhe të shkurtër kohore të shpenzohen plot 15 milion euro nga buxheti shtetëror, për dy palë zgjedhje.
Por dhe pa këto të dytat, parashtrohet pyetja se cila është logjika që të shpenzohen 7.5 milion euro për zgjedhje me të cilat nuk janë dakord që të mbahen asnjëra nga partitë tjera në Maqedoni, po dhe komuniteti ndërkombëtar, me përjashtim të partisë të VMRO-DPMNE-së së Gruevskit? Tesheshi.com kontaktoi dhe morri mendimin e analistit Alajdin Demiri dhe ekspertit ekonomik Ali Maksuti…
Alajdin Demiri: Logjika e VMRO dhe Gruevskit, të krijojnë problem të ri që të harrojnë të vjetrin
Logjika e VMRO-së dhe Gruevskit për të hyrë e vetme në zgjedhje pa pjesëmarrjen e partive tjera, është një logjikë që nuk kuptohet dhe logjikë jopolitike. Nëse e analizojmë pak strategjinë e Gruevskit dhe VMRO-së nga paraqitja e “bombave” e deri më sot, ekziston një logjikë e krijimit të problemit të ri që të harrohet problem i vjetër. Kështu, kur filluan “bombat” të sqarojnë se kush sa është i implikuar në krime, atëherë Gruevski doli me një situatë të kundërofenzivës me anë të protestave proqeveritare. Nga ana tjetër filloi të zbatojë pjesërisht disa nga pikat e Marrëveshjes së Përzhinos , por anashkalonte pikat tjera. Në këtë formë filloi të harrohet kush dhe sa është i implikuar në krime. Kur u morr vesh për formimin e Gjykatës Speciale, atëherë e nxori problemin e Ligjit për media dhe listat zgjedhore, që do të thotë se vlerësuesi i saktë e vëren këtu se ka një varg të problemeve që VMRO-ja i prodhon me qëllim që të mbulojë problemet e mëparshme. Ja edhe zgjedhjet e 5 qershorit që nëse mbahen, që dyshoj shumë se do mbahen, duhet të jenë instrumenti i radhës i VMRO-së që do t’i shërbejë për t’i harruar problemet e mëparshme. Kjo është logjika e veprimit të tyre. Mirëpo kur e kemi parasysh se sa kushtojnë zgjedhjet, 7 apo 8 milion, kjo dëshmon për përgjegjësinë ekonomike të VMRO-së, se sa ata janë në gjendje të shpenzojnë para për veprime të pakuptimta, duke e ditur se ato zgjedhje askush nuk do t’i pranoje, askush nuk do t’i legjitimoje, por do të jenë bazë që të formohet një lloj parlamenti që pastaj të thirren zgjedhjet tjera. Kjo logjikë është e pranueshme vetëm për VMRO-në, e cila në mënyrë permanente është duke sulmuar dhe krijuar probleme dhe kriza që të mbijetojë. Ndryshe, në moment të qetësisë politike dhe veprimit politik VMRO nuk do të mund të ekzistojë”, ka deklaruar për portalin tesheshi.com, Alajdin Demiri.
Ali Maksuti: Pushtetmbajtësve nuk ju intereson sa para shpenzojnë për ta shpëtuar kokën e tyre
“Pa marë parasysh sa parti marrin pjesë në zgjedhje, Komisioni Shtetëror Zgjedhor e ka të caktuar paraprakisht sa janë shpenzimet për mbajtjen e zgjedhjeve parlamentare.
Për këtë arsye, për shpenzimet e KSHZ nuk është faktor numri i partive por vet mbajtja e tyre, prandaj a është një apo dhjetë, shpenzimet janë të njëjtat, por sa ka logjikë, në Maqedoni shumë veprime dhe vendime politike prej kur ka filluar kriza politike në Maqedoni janë të palogjikshme, siç është edhe rasti i zgjedhjeve ku vetëm një parti ka paraqitur pjesëmarjen dhe detyron KSHZ të pranoj mbajtjen e tyre me anëtarët e tyre që i kanë caktuar në KSHZ. Dëmtimi i buxhetit për mbajtjen e këtyre zgjedhjeve të pavlefshme , që edhe vet VMRO-DPMNE e dinë se janë të pavlefshme, është edhe një tregues se politikanët aktual në qeveri nuk janë shumë të interesuar që mos dëmtohet shteti apo qytetarët sa janë të interesuar që çdo hapësirë ligjore të shfrytëzojne, edhe buxhete të dëmtojnë që të shpëtojnë kokat e tyre”, ka deklaruar për portalin tesheshi.com, eksperti ekonomik, Ali Maksuti.
Nga KSHZ kanë informuar se pjesa më e madhe e parave nga 7.5 milion euro, gjegjësisht 40 milion denar do të dedikohen për shtypjen e fletëvotimeve dhe udhëzimeve të ndryshme. Për transport janë paraparë 9 milion denarë, ndërsa për mjete tjera 9.2 milion denarë. Shtypja e listës zgjedhore parashihet të kushtoje 4 milion denarë, transporti i anëtarëve të bordeve zgjedhore në KSHZ gjatë ditës së zgjedhjeve do të kushtojë 25 milion denarë, ndërsa 9 milion denarë janë të nevojshme për transportimin e materialit të besueshëm, 9 milion tjera për ruajtjen e materialit të besueshëm.
Nga buxheti për zgjedhjet, 25 milion denar janë parapa për zgjedhjet në diasporë, të cilat nuk do të harxhohen, pasi që në diasporë nuk do të ketë votime.
Nga KSHZ sqaruan se nëse mbahen zgjedhjet me një parti ose më shumë parti, buxheti mbetet i njëjtë. /tesheshi.com/
