Nga Blendi Gashi
Miratimi i ligjit për “Trepçën”, nga partnerët e koalicionit qeverisës, PDK dhe LDK po konsiderohet suksesi më i madh i tyre.
Krerët e dy subjekteve në fjalë, menjëherë pas miratimit të këtij ligji janë vërsulur duke u munduar që minatorëve t’ia shesin miratimin e ligjit në fjalë si sukses të tyre.
Kryeministri Isa Mustafa, pas miratimit të ligjit uroi minatorët duke thënë se “në ‘Javën e Minatorit’, në fillim të këtij viti, u pata premtuar minatorëve se zgjidhjen e ‘Trepçës’ do e bëjmë në të mirë të të gjithëve. Sot u aprovua ligji për ‘Trepçën’, ligj ky që i hapë rrugë zhvillimit. Me Fat!”, shkroi Mustafa në Facebook, ditën kur u miratua ligji nga Kuvendi i Kosovës.
Minatorët i uroi edhe kryekuvendari Veseli i cili po ashtu përmes një postimi në Facebook shkroi se “Trepça ishte, është dhe do të jetë e Kosovës. Urime!”.
Ndërsa PDK si parti politike nuk ka dalë me ndonjë kumtesë ku do t’ia atribuonte meritat vetes për miratimin e ligjit, partia e dytë në vend, LDK -ja, nuk ka hezituar t’ia atribuojë kreut të saj, Isa Mustafa, i cili njëherësh është edhe kryetar i qeverisë së vendit.
Por ndërsa kjo temë ka bashkuar PDK-në e LDK-në, pasi janë pjesë e koalicionit qeverisë, është pikërisht “Trepça”, që pritet t’i përplasë ato në zgjedhjet e ardhshme parlamentare, ku gjatë fushatës zgjedhore si njëra ashtu edhe tjetra do ta quajë sukses të tyre miratimin e këtij ligji, me qëllimin e vetëm që të fitojnë sa më shumë vota.
Kështu vlerësojnë përfaqësues të partive opozitare dhe njohës të rrethanave politike në vend.
“Thaçi, Mustafa e Veseli duke shfrytëzuar ‘Trepçën’, po duan të dalin ‘patriotë’”
Deputetja e Vetëvendosje-s, Donika Kadaj-Bujupi, beson fuqishëm se krerët e partive në pushtet gjatë zgjedhjeve të ardhshme parlamentare do të mundohen të fitojnë poena politik duke u thirrur në miratimin e ligjit për “Tpreçën”.
“Trinomi famëkeq Thaçi-Mustafa-Veseli duke shfrytëzuar ‘Trepçën’, po duan të dalin ‘patriotë’ tash kur po afrojnë zgjedhjet. Në vend të ligjit që sjellë zhvillim e rivitalizim të ‘Trepçës’, këta banditë e lanë këtë aset kombëtar të hapur për privatizim. Tash, kur duan të aktrojnë se janë në ‘betejë’ me Listën Serbe për ta mbrojtur ‘Trepçën’, i bëjmë me dije kësaj treshe kriminale se askush nuk bie pre e mashtrimeve të tyre”, thotë Kadaj-Bujupi, për tesheshi.com.
“PDK e LDK do të tentojnë të fitojnë vota duke u thirrur në ‘Trepçën’”
Edhe analistët politikë mendojnë se PDK e LDK në zgjedhjet e ardhshme kurdo që mbahen ato do të përmendin ‘Trepçën’, si sukses të tyre vetëm e vetëm që të marrin nga qytetarët votat e tyre.
Islam Krasniqi, thotë se dy partitë qeveritare PDK-LDK zgjedhjet e ardhshme do të tentojnë që t’i fitojnë duke u thirrur në suksesin e tyre në miratimin e ligjit të ‘Trepçës’.
“LDK-ja gjithë meritat e këtij ligji ja adreson kryetarit të këtij subjekti Isa Mustafa, duke e harruar edhe partnerin e kualicionit PDK-në dhe kreun e saj Kadri Veseli. Qytetarët e e vendit me padurim e kanë pritur këtë vendim për ‘Trepçën’, dhe sigurisht që LDK duke shfrytëzuar këtë ligj do të mundohet që të marrë sa më shumë përkrahje nga qytetarët në zgjedhjet e ardhshme”, thotë Krasniqi, për tesheshi.com.
Edhe njohësi i rrethanave poitike në vend, Faik Krasniqi, thotë se padyshim se PDK edhe LDK miratimin e ligjit për ‘Trepçën’, do ta përdorin si sukses të tyre në zgjedhjet e reja.
“Ata qysh tash kanë filluar meritat t’ia atribuojnë vetvetes. Por jo vetëm për ‘Trepçën’, por edhe për liberalizimin e vizave (kur të ndodh), anëtarësimin në FIFA dhe UEFA, medaljet e arta të Majlinda Kelmendit e çka jo tjetër. Madje, do t’i rikthehen avazit të vjetër duke e akuzuar njëra-tjetrën për keq-qeverisje, për dështimet e shumta, kapjen e shtetit, klanin ‘Pronto’ dhe për vrasjet e pasluftës. Do të dëgjojmë lloj-lloj përrallash nga të dyja anët! Do të tentojnë të na mbushin mendjen që kanë qenë në opozitë, e jo në pushtet!”, thotë Krasniqi, për tesheshi.com.
Zgjedhjet paramanetare në Kosovë janë të parapara të mbahen në vitin 2018-të.
Ndërsa partitë në pushtet thonë se zgjedhjet do të mbahen në kohën e paraparë por se janë të gatshme edhe për zgjedhje të jashtëzakonshme, partitë opozitare si dhe analistët besojnë se qytetarët do t’iu drejtohen kutive të votimit në fund të këtij viti apo më së largu vitin e ardhshëm. /tesheshi.com/
