Kryeministri Isa Mustafa është shfaqur entuziast pas miratimit të ligjit për “Trepçën”, duke iu gëzuar për më tepër faktit të një bashkimi shqiptar në votën “pro”. Madje ai, nëpërmjet një statusi në FB kushtuar këtij momenti politik, ka falënderuar një pjesë të opozitës, sidomos AAK-në dhe Nismën, siç është shprehur, për kontributin e dhënë në miratimin e këtij ligji të rëndësishëm.
Statusi i tij i plotë në FB:
“Dje kaluam një ditë të rëndësishme destinuar Trepçës dhe ardhmërisë së saj. Aprovuam një ndër ligjet më të mira në Kuvendin e Republikës së Kosovës, Ligjin e Trepçës. Trepça na bashkoi të gjithëve, ata që e përkrahën, por edhe ata që nuk e përkrahën ligjin. Një kontribut shumë të mbarë e dhanë edhe deputetët e AAK-së dhe të Nismës. Aty ishin edhe deputetët e Listës Serbe, të cilët e shfrytëzuan të drejtën e tyre të prezantojnë qëndrimet për Ligjin në një proces demokratik.
E përgëzoj Kuvendin, i cili 17 vjet pas çlirimit arriti, që së bashku me Qeverinë, t’i jap drejtimin e duhur zhvillimit të Trepçës.
Akoma nuk i kemi përfunduar të gjitha punët e shtetndërtimit tonë, prandaj na nevojitet një bashkëpunim dhe unitet më i lartë për tema që janë në interes të të gjithëve” (sic.). /tesheshi.com/
