Nga Musa Mustafa
Një ndër ndërmarrjet me kapacitet më të madhe ekonomik në Kosovë, rajon dhe botë, “Trepça’ ka jetë vetëm edhe 7 muaj nëse qeveria e Kosovës nuk sjell ligjin për Trepçën.
“Menaxhmenti i Trepçës dhe Mitrovica duhet t’iu bëjnë me dije qartazi grupeve politike dhe para politike se nukdo të lejojmë që të pasurohen në kurriz të Trepçës, nuk do të lejojmë që politika, pa marrë parasysh kush qeveris, të futë kthetra në Trepçë për qëllime djallëzore”.
Këto komente janë bërë të premten në Mitrovicë në një takim të organizuar nga menaxhmenti i Trepçës me ish-ekspertët e këtij gjiganti ekonomik dhe me Universitetin e Mitrovicës, Fakultetin e Gjeoshkencave.
“Ekziston një konsensus maksimal se statusi i Trepçës duhet të zgjidhet menjëherë si një status zhvillimor, në të kundërtën për Trepçën do të ketë pasoja të paparashikueshme”, ka thënë Ahmet Tmava, menaxheri i Trepçës.
Ai ka shtuar se “duke u bazuar në posedimin e resursit material dhe njerëzor, krijimin e bazës për aktivizimin e metarlugjive, shfrytëzimi racional i resurseve etj., mendojmë se statusi i Trepçës duhet të ketë karakter publik si një shoqëri aksionare me aksione 100 për qind të qeverisë së Kosovës, e që nënkupton përfshirjen e të gjitha minierave aktive dhe pasive dhe vendburimeve të tjera deri në flotim”.
“Pas nxjerrjes së ligjit, pesë vitet e para Trepça do të synojë modernizimin me teknologji me produktivitet të lartë; hapja e horizonteve të reja dhe largimi i ujit nga minierat që janë të fundosura”, tha Tmava.
Sipas tij, nga këto investime pritet që efektet të jenë shumë pozitive, pra eksport rreth 250.000.000 euro në vit, punësim të 5-6 mijë punëtorëve, si dhe punësim sekondar të rreth 15.000 punëtorëve të tjerë.
Tmava ka shtuar se “Trepça posedon resurse minerale nga 58-68 milion ton xehe e që reflekton fuqi reale ekonomike”.
Në anën tjetër, ish-menaxheri i Trepçës, Nazmi Mikullovci, ka theksuar se Trepçës tani i kanë mbetur edhe 7 muaj jetë, nëse qeveria e Kosovës nuk e sjell ligjin për Trepçën.
“Trepça, menaxhmenti i saj dhe qeveria, duhet direkt të interesohen për pasurin e Trepçës në Serbi dhe në ish-republikat tjera të Jugosllavisë, pasuri kjo që kap shumën prej miliarda euro”, ka thënë Mikullovci, ish-drejtor i Trepçës në kohën më të lavdishme të saj.
Mikullovci ka shtuar se borxhi i Trepçës përflitet se është 1.5 miliard euro, ndërsa që më shumë se një miliard euro prej tyre janë para dhe aksione të punëtorëve të Trepçës.
“Mendoj se qeveria e Kosovës duhet të krijojë përmes AKP-së (Agjensioni Kosovar i Privatizimit), një Trepçë të re, ndërsa borxhet që janë shkaktuar nga koha e Millosheviqit kur ish-Jugosllavia ka qenë nën embargo ekonomike nga ana e OKB-së, të mbesin në Trepçën e vjetër”, shtoi Mikullovci.
Ai ka gjithashtu tha se Trepça jo vetëm që duhet të nxjerr plumbi e zink por duhet të nxjerr edhe metalet e rralla si është indiumi e që kanë një leverdi më të madhe ekonomike.
Ndërsa eksperti tjetër i Trepçës, Shyqyri Kelmendi ka theksuar se “Trepça është një pasuari e madhe kombëtare, qeveria e Kosovës duhet të investojë në teknologjinë si në ndërtimin e metarlugjisë së plumbit e që kushton 100 milion euro, metralugjia e Zinkut 36-40 milion euro, industria kimike 17-20 milion dhe 50-80 milion duhet të ndajë për zgjidhjen e problemit të rasteve sociale të punëtorëve të cilët siç e dimë mirë një pjesë e tyre ka mbetur as në qiell e as në tokë”.
Kelmendi ka shtuar se menaxhmenti i Trepçës dhe Mitrovica duhet t’iu bëjnë me dije institucioneve të Kosovës që të mos e fusin politikën në Trepçë, par parapolitika dhe grupeve të tjera duhet me ju bë me dije se nuk do të përfitojnë në kurriz të Trepçës.
Ndërsa ish-drejtori i Trepça Banka, Nystret Maxhera ka theksuar se Trepça do t’i paguaj të gjitha borxhet, por borxhet duhet të vërtetohen në arbitrazh ndërkombëtar.
“Nëse pitja është hëngër, tepsia ka mbet, pra kreditorët që pretendojë se Trepça iu ka borxh duhet të vërtetojë çdo cent se ku është investuar në Trepçë”, ka thënë Maxhera dhe ka shtuar se ka dyshime të bazuar se kreditorët që pretendojnë se Trepça iu ka borxh, ata kanë financuar luftën e kriminelit Millosheviqit që kreu masakrat më të tmerrshme në Ballkan.
Nëse ligji për Trepçën nuk aprovohet në Parlamentin e Kosovës më së largu edhe 7 muaj në bazë të ligjeve të aprovuar nga UNMIK-u, ndërmarrja Trepça falimenton duke kaluar në pronësi të kreditorëve. /tesheshi.com/
