Vjen dhe reagimi i parë nga Uashingtoni lidhur me trenin serb të ndaluar nga Prishtina zyrtare që të hyjë në Mitrovicë; i konsideruar si një akt provokativ nga ana e Beogradit
Ambasada e Shteteve të Bashkuara në Prishtinë ka dalë në krah të autoriteteve kosovare, duke i thënë kështu në “stop” të fortë trenit serbo-rus.
“Kosova është një vend sovran dhe i pavarur dhe ne respektojmë të drejtën e saj për të menaxhuar këdo dhe çfarëdo që kalon kufijtë e saj”, thuhet në një deklaratë të orëve të fundit.
“Shtetet e Bashkuara mbështesin fuqishëm dialogun e ndërmjetësuar nga BE, si mënyra më e mirë përmes të cilës Kosova dhe Serbia mund të normalizojnë marrëdhëniet mes tyre”, thuhet më tej në deklaratë.
Uashingtoni u kërkon palëve që të shmangin retorikën e rrezikshme dhe të vazhdojnë të punojnë për përmirësimin e raporteve dypalëshe.
“Sot ne festojmë ditëlindjen e Martin Luther King Jr, i cili pati thënë: ‘gjithmonë është koha e duhur për të bërë gjënë e duhur’. Në këto momente është koha e duhur për të punuar për bashkëpunimin dhe kundër konfrontimeve”, thuhet në deklaratën e ambasadës amerikanë në Prishtinë. /tesheshi.com/
