Pas reagimeve të shumta nga partitë opozitare dhe përfaqësues të ndryshëm të partive politike, ka ardhur edhe deklarimi i ministrit të Punëve të Brendshme, Skënder Hyseni, për trenin serb me mbishkrime kundër Kosovës që pritet të mbërrijë sonte në Mitrovicë.
Hyseni i ka thënë stacionit radiofonik Evropa e Lirë se me trenin e nisur nga Serbia për në Kosovë do të veprohet konform ligjit dhe Kushtetutës së Kosovës, por nuk ka treguar nëse qeveria do e ndalojë atë që të hyjë në territorin e shtetit, pasi nuk ka leje për një gjë të tillë.
“Ju siguroj që Ministria e Punëve të Brendshme dhe Policia e Kosovës do të zbatojnë ligjin, në funksion të ruajtjes së kushtetutshmërisë dhe ligjshmërisë. Unë jam në ministri me drejtorinë e policisë, dhe jemi duke e përcjellë situatën e do të veprojmë konform ligjit dhe kushtetutës,” ka deklaruar Hyseni.
Përndryshe, pas thirrjes së presidentit Thaçi që treni serb të mos lejohet të hyjë në Kosovë, një gjë të tillë së fundmi e ka kërkuar edhe deputeti i PDK-së Adem Grabovci, i cili thotë se qeveria duhet të jetë në krye të përgjegjësive që ka marrë, që të mos shkelet integriteti territorial i vendit.
Treni serb pritet të mbërrijë në Mitrovicë rreth orës 19:30. /tesheshi.com/
