Ministri i Brendshëm, Skender Hyseni, raportoi sot në komisionin kuvendar për siguri, pas ngjarjes me trenin serb i cili u pengua që të hyjë në Kosovë.
Ai para anëtarëve të komisionit tha se MPB ka qenë në koordinim të përditshëm me policinë për veprimet që do të evitonin ndonjë incident në një situatë të paqartë.
Hyseni tha se për këto veprime nuk është vepruar ad- hoc qysh pretendohet të paraqitet, përkundrazi, sipas tij, ka pasur takime të shumta.
Ai tha se planet e policisë s’kanë mundur të zbulohen paraprakisht sepse dërgimi më herët i policisë në veri do të ngjallte reagime të tjera.
“Sepse në atë pjesë ku pritej të hynte treni kishim frikë nga një objekt i braktisur, i errësuar. Ishte kohë dimri dhe errësirë e plotë… është mirë që ka përfunduar pa incidente. Deri në ora 10.55 ne i kemi mbajtur policët atje që mos të zihemi befasisht”, tha Hyseni.
Ai u bëri thirrje të gjithëve që të jenë të vëmendshëm në këtë periudhë, që sipas tij 3 apo 4 muaj e ardhshëm janë shumë të ndjeshëm që mund të prodhojnë situata të ndryshme.
Kryetari i komisionit për siguri, Daut Haradinaj ka përgëzuar Hysenin për veprimet e fundit në veri.
Përgëzime për veprimet e policisë dhe qeverisë ka dhënë edhe deputetja e PDK-së Ganimete Musliu, si dhe deputetët tjerë. /tesheshi.com/
