Akti i bllokimit të një treni serb për të hyrë në Kosovë nga ana e autoriteteve të Prishtinës, i konsideruar si një provokim nga Beogradi, ka bërë që me dhjetra serbë të komunave veriore të mblidhen për të protestuar tek sheshi i Car Llazarit në veri të Mitrovicës.
Protesta sipas tyre, bëhet kundër veprimeve që kanë për synim frikësimin e tyre, duke iu referuar pikërisht bllokimit të trenit.
Sakaq, presidenti Thaçi i ka përcjellë një mesazh Beogradit, me një gjuhë sa burrërore aq dhe diplomatike.
“Shpresoj se leksioni u kuptua nga ky provokim. Fqinjët e mirë nuk ndërhyjnë me projekte ekstremiste, ata dialogojnë”, ka shkruar Thaçi në Twitter.
Ndërsa nga ana tjetër, shefja e diplomacisë europiane, Federica Mogherini, tha se ajo dhe ekipi i saj po e vëzhgojnë nga afër zhvillimin e marrëdhënieve mes Beogradit dhe Prishtinës këto ditët e fundit.
“BE-ja është në kontakt të vazhdueshëm me të dyja palët për ngjarjet e së shtunës, ka pohuar zëdhënësja e saj, Maja Koçijançiç.
Kjo e fundit tha në deklaratën e saj se “dialogu është mënyra e vetme për të zgjidhur çështjet e pazgjidhura me interes të përbashkët”. /tesheshi.com/
