Po, mos u habisni: makina e parë pa shofer e kompanisë së shërbimit të taksive Uber, është gati të ofrojë shërbimet e saj. Ky shërbim pritet të ofrohet brenda këtij muaji në mënyrë eksperimentale vetëm në qytetin amerikan të Pistburgut (Pittsburgh).
Makinat e zgjedhura për këtë test janë të Volvos, të pajisura me gjithçka të nevojshme për të udhëtuar vetëm. Megjithatë, gjatë fazës eksperimentale, në makinë do të jenë të pranishëm edhe një teknik, i cili do të ndërhyjë në rast nevoje, dhe një ndihmës që do të shënojë çdo gjë që do të ndodhë gjatë rrugës.
Ndryshe nga kompanitë e tjera, Uber ka zgjedhur që këtë teknologji mos ta zhvillojë vetë, por ta blejë nga një tjetër kompani e specializuar në këtë fushë.
Nëse gjithçka shkon sipas parashikimeve, shumë shpejt do të jemi në gjendje të përjetojmë të ardhmen e makinave pa shofer. /tesheshi.com/
