Përveç Amerikës Latine, numri i protestave është rritur në të gjitha rajonet e botës vitin e kaluar, sipas raportit vjetor të kompanisë së sigurimeve Allianz Commercial.
Në 20 vendet që vuajnë më shumë, u regjistruan më shumë se 80,000 protesta, me Indinë në vendin e parë me 18,600.
Statistikat përfshijnë tubime politike të të gjitha llojeve – demonstrata paqësore dhe të dhunshme, greva dhe forma të tjera proteste, siç janë bllokimet e rrugëve të organizuara nga aktivistët e klimës.
Në Gjermani, Allianz regjistroi 4,000 mitingje dhe ngjarje të tjera të motivuara politikisht në rrugë, një rritje prej më shumë se një të tretën krahasuar me vitin 2023.
Kjo e vendos Gjermaninë në vendin e gjashtë në mesin e 20 vendeve me më shumë protesta. Përveç Indisë, ajo ndiqet edhe nga SHBA, Franca, Pakistani dhe Meksika.
“Pasiguria dhe zhgënjimi në rritje reflektohen në rritjen e papritur të protestave dhe trazirave,” komentoi Serdan Todoroviç, një ekspert për dhunën politike në Allianz.
Protestat antiqeveritare numerikisht janë vetëm një pjesë e vogël e të gjitha tubimeve, por ato shpesh mund të zgjasin me muaj. Demonstratat e gjata në Turqi dhe Serbi ende nuk janë përfshirë plotësisht në analizë.
Në disa vende, sipas vlerësimeve të siguruesve, pasojat ekonomike janë më të mëdha se dëmet e shkaktuara nga fatkeqësitë natyrore.
Në Evropë, ekspertët po paralajmërojnë veçanërisht për kërcënimin në rritje nga terrorizmi – me 67 sulme vitin e kaluar, afërsisht dyfishi i numrit të një viti më parë, thuhet në raport.
Të dhënat e kërcënimit terrorist vijnë nga organizata australiane kërkimore Vision of Humanity. Dhuna ekstremiste raportohet gjithashtu të jetë rritur në disa vende, përfshirë Gjermaninë.
Në Evropë, Allianz pret edhe më shumë përpjekje për të sabotuar infrastrukturën dhe kompanitë. Rusia, Koreja e Veriut dhe Irani janë veçanërisht nën dyshime. /tesheshi.com/
