Nga Bashkim Kastrati
Një lajm i mirë vjen sa i përket pickimit të rriqrave në Kosovë. Jo se ka pasur numër të vogël të të pickuarve nga rriqrat, por se ato pickime nuk janë shoqëruar me ethet hemorragjike Krime Kongo.
Infektimi me Krime Kongo kishte marrë disa jetë njerëzish ndër vite në Kosovë, ndërkaq gjatë këtij viti 278 persona janë trajtuar në Klinikën Infektive për shkak të pickimit nga rriqrat dhe përkeqësimit të gjendjes, por fatmirësisht që të gjithë kanë shpëtuar, pasi që pickimi nuk është shoqëruar edhe me ethet hemorragjike Krime Kongo.
Vetëm në Komunën e Malishevës, gjatë këtij viti, nga rriqrat janë pickuar mbi 800 qytetarë.
Nga ethet hemorragjike Krime Kongo, vetëm gjatë vitit 2013, kanë vdekur 11 persona, ndërkohë që shifrat tregojnë se të pickuar nga rriqrat ishin 5,200 persona. Zonat e identifikuara endemike me rriqra janë Malisheva, Rahoveci, Suhareka dhe Klina.
Në këto zona për çdo vit bëhen dezinsektimi me qëllim që të minimizohen rastet e pickimeve nga rriqrat, por zakonisht ky lloj i rriqrave rri thellë nën tokë dhe i reziston këtij dezinsektimi.
Ja si u trajtuan të prekurit nga rriqrat dhe cili është infeksioni që po shqetëson mjekët
Fakti që këtë vit nuk ka pasur shfaqje që etheve hemorragjike Krime Kongo ka gëzuar infektologët, por ata tashmë janë shqetësuar nga një sëmundje tjetër e rrezikshme që njihet si ethet hemorragjike Hantan, infeksion ky që i reziston edhe terapive përkatëse dhe mund të shkaktojë vdekjen e pacientit edhe pse është nën kujdesin intensiv të infektologëve.
Profesor Hamdi Ramadani, drejtor i Klinikes Infektive në Qendrën Klinike Universitare të Kosovës (QKUK) ka thënë për tesheshi.com se ka pasur disa raste të pacientëve që janë hospitalizuar për shkak të pickimit të rriqrave dhe se të gjithë kanë marrë trajtimin e duhur në këtë klinikë. Ai konfirmon se tek pacientët e prekur nga rriqrat këtë vit fatmirësisht nuk ka pasur shfaqje të etheve hemorragjike Krime Kongo.
“Gjithsej të referuar në Klinikën Infektive ambulantore dhe të shtrirë për ketë vit (gusht) kanë qenë 278 të prekur apo të pickuar nga rriqrat. Dy kanë qenë të hospitalizuar, të shtrirë me ethe hemorragjike dymbëdhjetë raste, tre nga këta të sëmurë me llojin e etheve hemorragjike. Me Krime Kongo nuk ka qenë asnjë rast”, thotë Ramadani.
Ai thekson se këtë vit shqetësuese kanë qenë të prekurit me ethe hemorragjike Hantan ku si pasojë edhe një person ka humbur jetën.
“Kanë qenë pesë raste me ethe hemorragjike Hantan infeksione. Me sindroma renale dhe ethe hemorragjike janë trajtuar pesë raste të renda, nga këta një ka vdekur, ndërsa një rast ende është duke u mjekuar në këtë Repart B, me gjendje të mirë shëndetësore”, u shpreh profesor Ramadani.
Virusi Hantan i cili bartet përmes minjve, siç shihet është shumë i rrezikshëm, por lajmi i mirë është që ai hyn në grupin e viruseve i cili nuk transmetohet prej njeriu në njeri. Rreziku kryesor paraqitet nëse minjtë bien në kontakt me ushqimin e njerëzve.
Virusi Hantan është zbuluar (izoluar) gjatë dy dekadave të fundit (1993) dhe burimin e ka kryesisht nga viset aziatike, Rusia. Së pari është përdorur në Luftën Koreane (1950-1953), pa pasur njohuri se për çfarë bëhet fjalë. Më vonë, ka pasur përafërsisht 30 raste në botë, në shtetet e Azisë, Evropës dhe Amerikës.
Duhet theksuar se gjatë muajit korrik të këtij viti, sëmundja infektive ethe hemorragjike Hantan ka shkaktuar vdekjen e babait dhe të birit nga Simnica e Gostivarit. Viktimat ishin të moshës 24 dhe 50 vjeç dhe ndërruan jetë në klinikën e Shkupit.
Ndryshe, Instituti Kombëtar i Shëndetit Publik, nëpërmjet Ministrisë së Shëndetësisë, bashkë me grupin ndërministror, ku hyn edhe Ministria e Bujqësisë, Agjencia e Veterinës dhe Ushqimit, Ministria e Punëve të Brendshme dhe Ministria e Mjedisit, ka disa vite që po zbatojnë planin operacional për parandalimin e sëmundjes së etheve hemorragjike. /tesheshi.com/
