Numri i njerëzve që jetojnë nën kufirin e varfërisë është rritur me 165 milionë gjatë viteve të fundit, sipas një raporti të Kombeve të Bashkuara të publikuar të premten.
Për shkak të pandemisë së koronavirusit dhe ndërprerjeve ekonomike që nga viti 2020, paratë në dispozicion të njerëzve të prekur nga varfëria kanë rënë nën shifrën ditore prej 3,65 dollarësh, njoftoi Programi i OKB-së për Zhvillim UNDP.
“Ky numër në realitet mund të ishte edhe më i lartë nëse qeveritë nuk do të kishin prezantuar programe të sigurimeve shoqërore dhe shumë paketa stimuluese gjatë pandemisë së COVID-it,” tha shefi i UNDP-së, Achim Steiner, përfaqësuesi më i lartë i Gjermanisë në Kombet e Bashkuara.
“Sidomos për vendet me të ardhura të ulëta, kjo barrë është bërë e paqëndrueshme për momentin”, tha ai.
Të dhëna shqetësuese
“Një qeveri që nuk mund të punësojë më mjekë dhe infermierë në spitale, që nuk mund të sigurojë më ilaçe për qendrat shëndetësore rurale, në fakt po shkatërron infrastrukturën sociale të vendit,” tha Steiner.
“Dhe kjo reflektohet si mungesë e kujdesit shëndetësor, më pak arsim, pa rrjete sigurie sociale që mund të ofrojnë ndihmë të përkohshme për njerëzit që, pa fajin e tyre, janë gjetur në situata ku fjalë për fjalë nuk mund të ushqejnë më familjet e tyre”, ai shtoi.
Kombet e Bashkuara kanë paralajmëruar se 52 vende në botë janë në skllavëri borxhi nga e cila nuk do të dalin kurrë pa ndihmë.
Borxhi publik global është rritur në një rekord prej 92 trilionë dollarësh në vitin 2022, pesë herë më shumë se në vitin 2000.
Përafërsisht 40 për qind e popullsisë së botës, ose 3.3 miliardë njerëz, jetojnë në vende ku interesi i kredive tejkalon shpenzimet për shëndetësinë ose arsimin, njoftoi OKB. /tesheshi.com/
