Vizita e zyrtarit të DASH, Brian Hoyt Yee, të hënën dhe vendimi i Kolegjit Zgjedhor 3 ditë më vonë pritet t’i hapë dhe një herë rrugën opozitës për t’u futur në zgjedhje…
Protesta e sotme e opozitës ishte epilogu i një përpjekjeje 3-mujore të saj për imponuar një qeveri teknike dhe shtyrjen e datës së zgjedhje. Pas refuzimit të paketës “McAllister” për marrëveshje, nga Basha, edhe pse u zhvilluan dy takime mes tij e Ramës, PD-ja mbeti jashtë procesit zgjedhor të 18 qershorit.
Por a ka një plan tjetër që synon t’i japë dhe një mundësi opozitës për të hyrë në zgjedhje?!
Një deputet i Partisë Socialiste, i afërt me Ramën, tha për tesheshi.com se “do të bëhet dhe një përpjekje e fundit në ditët në vazhdim për të përfshirë edhe opozitën në zgjedhje”, por ai nuk sqaroi rrugën se si do të ndodhë kjo, përveç mundësisë së shtyrjes së datës, një kusht që PS-ja e ka pranuar dhe më herët gjatë negociatave mes palëve.
Zgjidhja politike
Mësohet se tentativat për një mundësi të fundit “pajtimi” mes palëve do të jenë politike dhe tekniko-ligjore. Momenti më i rëndësishëm për këtë zgjidhje shihet vizita e Zëvendës-ndihmës sekretarit amerikan për Evropën dhe Euroazinë, Brian Hoyt Yee, i cili vjen të hënën, më 15 maj, në Tiranë. Zyrtari i lartë vjen me mision shterues të Shteteve të Bashkuara të Amerikës për krizën politike në Shqipëri.
Para vizitës së tij janë ezauruar tashmë të gjitha “ndërhyrjet nga jashtë”, pasi dy europarlamentarët David McAllister dhe Knut Fleckenstein arritën të sillnin në Tiranë dhe paketën më të mirë të marrëveshjes ku opozitës i ofroheshin disa lëshime të mëdha, si emërimi i 4 ministrave kyç në qeveri, shtyrja e zgjedhjeve, kreu i KQZ-së, etj. Në këtë kontekst vizita e zyrtarit amerikan vjen për të vënë “pikat mbi ‘i’” për të gjitha palët dhe për të dhënë mesazhin zyrtar të Shtëpisë së Bardhë. Zgjedhjet pa opozitën nuk janë parë si pozitive as nga SHBA-të dhe as nga Brukseli, megjithëse e kanë cilësuar bojkotin e opozitës si zgjedhje të saj. Gjithsesi, në varësi të qëndrimit të Brian Hoyt Yee pritet të ketë dhe zhvillime politike që do të pasojë vizitën e tij, ku nuk përjashtohen negociata të reja mes palëve.
Zgjidhjen politike po e nxit edhe LSI-ja. Zyrtarë të kësaj partie, aleate me Ramën në qeverisje, po kërkojnë rikthimin e paketës “McAllister” në tavolinën e bisedimeve, ndërsa ish-kreu i kësaj partie i zgjedhur president, Ilir Meta, tha se ishte gati të jepte dhe dorëheqjen nëse kjo do t’i shërbente një marrëveshjeje mes palëve. LSI ka artikuluar vazhdimisht qëndrimin se “zgjedhjet nuk mund të bëhen pa opozitën”.
Zgjidhja ligjore
Tre ditë pas vizitës së zyrtarit të DASH, më 18 maj, Kolegji Zgjedhor do të marrë në shqyrtim një kërkesë të opozitës për nxjerrjen nul nga pikpamja juridike të zgjedhjeve të 18 qershorit. Kërkesa e firmosur nga PAA-ja, aleate me PD-në, i kërkon Kolegjit Zgjedhor të ç’regjistrojë listat e kandidatëve për deputetë të 15 partive që janë aktualisht pjesë e listës së zgjedhjeve. Nëse trupa e gjykatës së zgjedhjeve do ta pranonte këtë kërkesë dhe do të vendoste në favor të saj atëherë zgjedhjet e 18 qershorit do të quhen të pavlefshme duke i hapur rrugën për zgjidhjen juridike të shtyrjes së datës së zgjedhjeve, e cila është një nga kërkesat bazë të opozitës. /tesheshi.com/
