Presidenti Meta ka shfrytëzuar 3-vjetorin e Reformës në Drejtësi për ta pastruar imazhin e tij, edhe te ndërkombëtarët, si një armik i saj.
Për këtë, Meta i është referuar faktit se kur reforma morri 140 vota unanime, ai ishte kryetar Kuvendi.
“Krenar që 3 vjet më parë, në detyrën e Kryetarit të Kuvendit, këmbëngula për miratimin me konsensus të plotë të Reformës në Drejtësi, për të mos lejuar kapjen e sistemit përmes ndryshimeve kushtetuese. Sot kam një falënderim të veçantë për Komisionin e Venecias, për të gjithë ekspertizën e vyer e të pakursyer, që na dha në atë proces”, shprehet kreu i shtetit.
Sipas tij, është votimi i Reformës në Drejtësi ai që ofronte shansin e madh për çeljen e negociatave, por që këto të fundit tashmë rrezikojnë, gjithnjë sipas gjykimit të Metës, nëse nuk do ketë zgjedhje, siç këmbëngul, më 13 Tetor.
“Lidhur me çështjen se kur do të çelen negociatat, kjo do të ndodhë vetëm atëherë kur të gjithë qytetarët shqiptarë të ushtrojnë sovranitetin e tyre përmes zgjedhjeve të lira, të ndershme, demokratike, gjithpërfshirëse dhe të gjithëpranuara, për çdo nivel përfaqësimi politik dhe institucional”, shprehet presidenti.
Dhe, si për t’u promovuar si flamurtar i Reformës në Drejtësi, e kjo mu në kohën që dhe ndërkombëtarët po shihet si kundërshtar u saj, Meta ofron pamjet e atij votimi, ku realisht ai ishte kryetar Kuvendi. /tesheshi.com/
