Qeveria izraelite ka miratuar imigrimin e 3000 hebrenjve nga Etiopia e shkatërruar nga lufta, disa prej të cilëve kanë pritur për dekada për t’u bashkuar me të afërmit në Izrael.
Rreth 140,000 hebrenj etiopianë jetojnë në Izrael dhe drejtuesit e këtij komuniteti vlerësojnë se ka rreth 6,000 të tjerë në Etiopi.
Vendimi është një hap përpara në zgjidhjen e marrëdhënieve të ndërlikuara të Izraelit me komunitetin hebre etiopian, raportojnë mediat.
Megjithëse familjet që lejohen të emigrojnë janë me origjinë hebreje dhe respektojnë zakonet hebraike, Izraeli nuk i konsideron ata hebrenj sipas ligjit fetar.
Në vend të kësaj, ata kërkojnë të emigrojnë në Izrael sipas një programi të bashkimit familjar që kërkon miratimin e posaçëm të qeverisë.
Në vitin 2015, u mor një vendim për të sjellë të gjithë etiopianët e mbetur me origjinë hebreje brenda pesë viteve.
Mijëra njerëz janë duke pritur në kampe
Në bazë të vendimit, 3000 persona do të mund të emigrojnë në Izrael, prindërit, fëmijët, vëllezërit dhe motrat e atyre që ndodhen tashmë në shtetin hebre, si dhe jetimët, prindërit e të cilëve kanë vdekur në Izrael.
Ministrja e imigracionit Pnina Tamano-Shata, e cila vetë emigroi në Izrael nga Etiopia, tha se vendimi korrigjoi padrejtësinë dhe se programi i imigracionit ishte një përgjigje ndaj njerëzve që kishin pritur shumë gjatë për të ardhur në Izrael me familjet e tyre.
Në një deklaratë të përbashkët me ministrin e brendshëm izraelit, ajo tha se vendimi ishte pjesë e një përgjigjeje ndaj situatës së sigurisë në Etiopi, ku dhjetëra mijëra njerëz u vranë gjatë përleshjeve midis qeverisë dhe forcave në rajonin Tigray.
Megjithatë, nuk dihet se kur do të fillojnë të vijnë etiopianët.
Kryetari i grupit të aktivistëve për imigrimin e hebrenjve etiopianë, Kasav Shiferav, e përshëndeti vendimin e sotëm, por tha se ka një rrugë të gjatë për të bërë dhe se mijëra njerëz kanë pritur në kampe, disa prej më shumë se 25 vjetësh. /tesheshi.com/
