Bullgaria ka vendosur kushte për heqjen e vetos duke bllokuar bisedimet e pranimit të Maqedonisë së Veriut me Bashkimin Evropian dhe dëshiron të shohë nëse Brukseli mund të garantojë që këto kushte të përmbushen, tha të enjten kryeministri bullgar Kiril Petkov, sipas Reuters.
Duke folur pas takimit me komisionerin e zgjerimit të BE, Oliver Varhelyi, Petkov, qeveria e të cilit humbi shumicën në parlament të mërkurën, hodhi poshtë akuzat nga ish-aleati i koalicionit se kryeministri aktual ishte gati të hiqte veton e Bullgarisë, pavarësisht nga interesat kombëtare.
“Bullgaria ka tre kushte të qarta nëse duam të bëjmë përparim në çështjen e Maqedonisë së Veriut,” u tha Petkov gazetarëve. “Ne po punojmë së bashku për të parë nëse do të jetë e mundur që BE të jetë garantuesi i këtyre kushteve.”
Sofja po i kërkon Maqedonisë së Veriut të miratojë disa garanci kushtetuese për të mbrojtur të drejtat e bullgarëve atje, si dhe të bëjë përparim në disa mosmarrëveshje historike.
Në vitin 2020, Bullgaria refuzoi të jepte dritën jeshile për fillimin e negociatave midis Maqedonisë së Veriut dhe BE-së për mosmarrëveshjet mbi historinë dhe gjuhën. Maqedonia e Veriut ishte bllokuar më parë nga Greqia derisa ndryshoi emrin e saj.
Varhelyi, në vizitën e tij të katërt në Bullgari në gjashtë muaj, shprehu zhgënjimin që ende nuk ka përgjigje për ngërçin me të cilin përballet Maqedonia e Veriut për anëtarësimin në BE.
Aleatët e Bullgarisë në BE dhe NATO po bëjnë presion për një marrëveshje që do të forconte perspektivën evropiane të Shkupit në samitin e ardhshëm të BE-së më vonë këtë muaj dhe do të ndihmonte në kufizimin e ndikimit rus në Ballkanin Perëndimor pas luftës në Ukrainë.
“Fakti që po kthehem do të thotë se ende nuk ka zgjidhje, gjë që është shumë frustruese”, tha Varhelyi. /tesheshi.com/
