Tre liderët shtetërorë të Kosovës, Presidenti, Kryeministri dhe Kryetari i Kuvendit, e kanë shkelur protokollin e shtetit, për shkak se të tretë pritet ta lëshojnë vendin në të njëjtën kohë.
Protokolli i Shtetit kërkon të ketë bashkërendim të axhendës së Presidentit, të Kryeministrit dhe të Kryeparlamentarit në mënyrë që këta tre të mos jenë në të njëjtën kohë jashtë vendit.
Presidenti Thaçi ka udhëtuar për në Shtetet e Bashkuara të Amerikës, ku do të marrë pjesë në “Lutjet e Mëngjesit”, kryeparlamentari Veseli ka udhëtuar për vizitë zyrtare në Kroaci, ndërsa kryeministri Haradinaj është në prag të nisjes për në ShBA, shkruan Zëri.
“Protokolli i Shtetit vihet në dijeni paraprakisht për çdo lëvizje të personaliteteve kryesore, presidentit, kryetarit të Kuvendit dhe kryeministrit jashtë shtetit. Vizitat bashkërendohen në mënyrë që të mos jenë të tre njëkohësisht jashtë vendit”, thuhet në nenin 19 të Ligjit për Protokollin e Shtetit. Kurse mosrespektimi i Protokollit po vlerësohet si papërgjegjësi e drejtuesve të shtetit. /tesheshi.com/
