Sekretari i Përgjithshëm i NATO-s, Jens Stoltenberg tha të mërkurën se gjatë vizitës së tij në vendet e Ballkanit Perëndimor, ka vërejtur tendencat separatiste në Bosnje, situatën e brishtë të sigurisë në Kosovë, si dhe stanjimin në normalizimin e marrëdhënieve ndërmjet Serbisë dhe Kosovës.
Në një konferencë për media me liderët e vendeve të Ballkanit Perëndimor, që janë edhe anëtarë të NATO-s, në Shkup, ai tha se stabiliteti duhet të jetë aspirata kryesore e vendeve të rajonit.
“Ky rajon është strategjikisht i rëndësishëm për NATO-n, por ka arsye për shqetësim kohët e fundit”, tha Stoltenberg.
“Është koha për të kapërcyer konfliktet lokale, si dhe për t’i dhënë fund luftës në Ukrainë.”
Në një konferencë të përbashkët për shtyp me presidentin kroat Zoran Milanoviç, kryeministrin Rama dhe mikpritësin, kryeministrin maqedonas Dimitar Kovačevski, Sekretari i Përgjithshëm i Aleancës vlerësoi Maqedoninë e Veriut si një anëtare të vlefshme të NATO-s dhe një shembull të një suksesi multietnik në shoqëritë e Ballkanit Perëndimor.
“Në Maqedoninë e Veriut, të gjitha bashkësitë etnike jetojnë në bashkëjetesë paqësore, e cila kontribuon në stabilitetin dhe prosperitetin e të gjithë shoqërisë”, tha Stoltenberg.
Stabiliteti në Ballkan, ndër synimet e Aleancës
Ai vuri në dukje se në vitin kur NATO feston 75 vjetorin e saj, qëllimet kryesore të Aleancës janë forcimi i potencialit strategjik të NATO-s, arritja e paqes në Ukrainë dhe stabiliteti në Ballkanin Perëndimor.
Ai theksoi se nuk ka “kërcënim të drejtpërdrejtë ushtarak” në Ballkanin Perëndimor, por gjithashtu tha se ka një vëmendje të shtuar të drejtuar ndaj rajonit.
“Ne shohim që vëmendja është rritur kryesisht për Kosovën, por edhe për Bosnjën, por nuk shohim ndonjë kërcënim të drejtpërdrejtë ushtarak. Ne jemi të shqetësuar për zhvillimin e ngjarjeve të caktuara në drejtim të gabuar, por në të njëjtën kohë, është e nevojshme të kuptojmë forcën dhe rëndësinë e NATO-s. Ne kemi qenë të pranishëm këtu për shumë vite. Kemi disa aleatë, kemi shtuar praninë tonë në Kosovë me rreth 1000 ushtarë të tjerë, madje edhe më të armatosur”, tha Stoltenberg dhe shtoi se NATO po monitoron nga afër situatën në rajon.
Ai theksoi se Aleanca po bën atë që u duhet aleatëve.
“Ne duhet të stabilizojmë fqinjësinë e NATO-s, sepse kështu jemi edhe më të sigurt. Prandaj fola me liderët e rajonit, kjo na ndihmon të kuptojmë më mirë situatën e sigurisë. Ne kemi një prani historike në Ballkanin Perëndimor dhe kjo është arsyeja pse ky takim ishte i rëndësishëm”, tha kreu i NATO-s. /tesheshi.com/
