Përfaqësueset e Italisë, Gjermanisë dhe Anglisë nuk do ta kenë të mundur t’i përfshijnë në listat e tyre tre lojtarët e mësipërm në përgatitjet për Europianin e Francës, që nis në qershor, vetëm një muaj më pas.
Marco Verratti, İlkay Gündoğan dhe Alex Oxlade-Chamberlain do të qëndrojnë jashtë Euro 2016-ës për shkak të dëmtimeve fizike.
Verratti, i cili luan në kampionatin francez me PSG-në, skuadrën kampione, do të kryejë një operacion më 16 maj, një ndërhyrje që parashikohet ta mbajë tetë javë jashtë fushave, duke i pamundësuar pjesëmarrjen në Europian.
Përfaqësuesja italiane humbet kështu një tjetër element të rëndësishëm. Verratti i bashkohet me mungesën e tij Claudio Marchisio-s, i dëmtuar gjithashtu jo shumë kohë më parë.
İlkay Gündoğan vuan prej kohësh nga dëmtimet e njëpasnjëshme. Lëndimi i fundit i 25-vjeçarit, në një seancë stërvitore të Borusias së Dortmundit, ia bën të pamundur pjesëmarrjen në aktivitetin europian të futbollit. Kombëtarja e Gjermanisë do të duhet të bëjë pa futbollistin me origjinë turke.
Dëmtimi mund të ndikojë dhe në karrierën e mesfushorit të Borusias, pasi Gündoğan është prej kohësh në planet e Mançester Sitit.
Tek Anglia nuk do të jetë Oxlade-Chamberlain. Lajmin e ka bërë të ditur trajneri i Arsenalit, Arsene Wenger. Mesfushori 22-vjeçar po linte pas një lëndim në gju, por do qëndrojë dhe gjashtë apo tetë javë të tjera pushim.
“Pata një bisedë me Alex-in dhe me ekipin tonë mjekësor ,” ka pohuar Wenger, “e ata më thanë se ai do të kthehet në korrik.”
“Eshtë shumë pikëlluese. Ai ishte gati fizikisht dhe dukej në formë. Ai është një lojtar me ndikim në lojë, dhe mund të kishte patur një kontribut të madh në suksesin e Anglisë,” do të deklaronte tekniku francez i topçinjve. /tresheshi.com/
