Edhe Bashkia e Kukësit nuk ia pranon tre dozat qeverisë së Kosovës, duke dalë në mbështetje të protestës që bënë qytetarët në pikën kufitare të Morinës.
Kryebashkiaku Safet Gjici u shpreh se vendimi i Kosovës për rregullat anti-covid në kufi është i “shfrenuar”.
“Bashkia Kukës në mbrojtje të qytetarëve të Kukësit. E dimë sa lidhje ka miqësore dhe jo vetëm me Prizren. Por mbi të gjitha shumë kuksianë punojnë në Prizren, bëjnë biznes në Prizren, i marrin thuajse të gjithë furnizimet nga aty.
Më duket një vendim i shfrenuar. Ne kemi pasur disa marrëveshje mes dy qeverive në nëntorin e kaluar për t’i lehtësuar në aspekte të tjera banorët që janë në zonat kufitare.”
Sipas tij, Kosova duhet ta rishikojë vendimin pasi po ndëshkohen qytetarët kuksianë.
“Uroj që qeveria e Kosovës ta rishikojë këtë vendim sepse realisht ndëshkon shumë qytetarë kuksianë. Me të drejtë, të vetorganizuar kanë bërë protestë, do t’u nisim një shkresë dy qeverive dhe urojmë që të merret një vendim dhe të hiqen këto kushte të rënda kufizuese. Kur një qytetar kuksian i ka dy vaksina të bëra, dhe s’kanë kaluar 6 muaj, nuk kanë pse të bëjnë një të tretë.” /tesheshi.com/
