Ministri i Jashtëm gjerman Heiko Maas falënderoi evropianët për kontributin e tyre në ribashkimin e Gjermanisë dhe në të njëjtën kohë bëri thirrje për solidaritet më të madh mes vendet evropiane. Të gjitha këto, të shprehura në një editorial që u publikua në 26 vendet e BE-së.
Më 9 nëntor, Gjermania shënon 30-vjetorin e rënies së Murit të Berlinit, që ishte shtysa për procesin që çoi përfundimisht në ribashkimin e shteteve të mëparshme të Gjermanisë Lindore dhe Perëndimore në 3 tetor 1990.
“Bashkimi i Gjermanisë ishte dhuratë e Evropës për Gjermaninë,” shkroi Maas në editorial.
“Dhe kjo ndodhi në fund të shekullit në të cilin Gjermania solli vuajtje të paimagjinueshme në këtë kontinent”, shtoi ai.
“Viti 1989 tregoi se çfarë mund të arrijë Evropa kur mendon përtej kufijve kombëtarë, por në të njëjtën kohë, kriza evropiane, Brexit dhe mosmarrëveshjet mbi refugjatët kanë krijuar shqetësime të reja”, shkroi ai.
Evropa mund të mbijetojë përballë sfidabve globale, siç është globalizimi dhe ndryshimi i klimës, vetëm nëse ajo mbahet e bashkuar – konkludon ai.
“Ankesat individuale të Varshavës, Berlinit ose Parisit, do hasin në ‘vesh të shurdhët’ në Moskë, Pekin dhe gjithnjë e më shumë në Uashington”, shtoi ai.
“Vetëm zëri i Evropës ka një peshë të konsiderueshme”, vuri në dukje Maas.
Ai i bëri thirrje Evropës të krijojë një politikë të përbashkët kundër Rusisë dhe Kinës, një aleancë mbrojtëse dhe të marrë një rol udhëheqës në luftën kundër ndryshimit të klimës.
Bota ka nevojë për guximin që Evropa kishte në 1989, tha ai.
“Ne guxojmë të jemi përfundimisht evropianë dhe duhet të veprojmë si evropianë”, shprehet Maas. /tesheshi.com/
