Nga Blendi Gashi
Lëvizja Vetëvendosje e Visar Ymerit jo pak ka befasuar opinionin këtë javë me veprimet që ka ndërmarrë, ku më së shumti sigurisht ka shkaktuar tronditje tek një pjesë e aktivistëve të saj që parreshtur e kanë përkrahur në çdo aksion.
Kjo parti e cila për vite me radhë përveç punës brenda institucioneve është e njohur edhe për shprehjen e pakënaqësive edhe me protesta në rrugë, vijave të kuqe me PDK-në e Thaçit dhe mos lidhjen e koalicionit me njerëz siç i ka quajtur të krimit e korrupsionit, siç duket ngadalë po i ha fjalët dhe këtë po e bën sigurisht për pushtet.
Distancimi i VV-së nga hedhja e ngjyrës në drejtim të objektit qeveritar dhe thyerja e xhamave pas aksionit “Drejtësi për Astritin”, heqja e vijave të kuqe me PDK-në dhe lidhja e koalicionit në Prishtinë me AKR-në janë tre befasitë e mëdha që partia e Ymerit la të shtangur aktivistët.
Distancimi i VV-së nga gjuajtja e qeverisë…
Padyshim se befasia më e madhe është distancimi i bërë nga VV-së ndaj gjuajtjes me ngjyrë në drejtim të qeverisë pas përfundimit të protestës “Drejtësi për Astritin”, kur dihet se aksionet e tilla në vazhdimësi janë organizuar prej tyre.
“Lëvizja Vetëvendosje distancohet nga ngjyra e hedhur drejt ndërtesës së qeverisë. Këto veprime nuk kanë qenë pjesë e agjendës organizative dhe janë njëkohësisht të papranueshme”, tha kjo parti përmes një komunikate pas përfundimit të protestës, duke mohuar në një mënyrë që aktivistë të saj kanë gjuajtur në drejtim të qeverisë.
Reagimi i aktivistëve ndaj distancimit…
Por ky distancim nuk u ka pëlqyer disa vetëvendosësve. Dhe një prej tyre është Valdrin Ahmeti, njëri nga organizatorët kryesor të aksioneve të VV-së, i cili është distanciar nga distancim i partisë.
“Distancohemi nga distancimi.
Sot në fund të marshit protestues, aktivistët përmes një aksioni simbolik hodhën shishe me ngjyrë të kuqe në drejtim të objektit të qeverisë.
Këto shishe le të jenë paralajmërim për qeverinë në rast se nuk plotëson kërkesat e këtij marshi protestues, e njëkohësisht le të jenë këndellje për shumë që mendojnë që drejtësia do të vihet në vend vetëm me fjalime”, thuhet në reagimin e vetëvendosësit Ahmeti.
Heqja e vijave të kuqe për PDK-në…
Befasia e dytë që servoi VV është deklarimi i kandidatit të saj për kryetar të Gjilanit, Sami Kurteshi i cili në emisionin “Rubikon” të KTV-së deklaroi se nuk ka vija të kuqe për asnjë parti, përfshirë këtu edhe PDK-në, duke thënë se do të bashkëpunojnë me secilën parti që gjejnë përputhshmëri në program.
“Për herë të parë do të jetë një qeverisje gjithëpërfshirëse që pranon dhe pajtohet me programin qeverisës të Lëvizjes Vetëvendosje. Për herë të parë ne do të bëjmë përpjekje që të marrim edhe pjesë nga programet e tjera në të mirë të Gjilanit”, ka thënë ai.
I pyetur nëse ka vija të kuqe për PDK-në, Kurteshi përgjigjet se “në Gjilan jo, s’ka me pas”.
Koalicioni i lidhur me “zhatësit” e AKR-së
Dhe befasia e tretë është lidhja e koalicionit të Shpend Ahmetit me AKR-në e Behgjet Pacollit në Prishtinë, për balotazhin e 19 nëntorit në Prishtinë.
Këto dy parti në të kaluarën kishin përplsje të mëdha ndërmjet vete dhe këtë e dëshmon më së miri një komunikatë e VV-së së Zvicrës e lëshuar një vit më parë ku Pacollët i konsideronte zhvatës.
“Denoncim publik ndaj dyshes zhvatëse Rrahim Pacollit dhe Gani Thaçit. Mërgatës shqiptare nga Kosova, s’po u ndahen zhvatjet. Përpos shumë investimeve individuale të shkuara dëm nën trysninë e adminisratës së korruptuar nga sundimtarët e Kosovës, si gjithnjë, në prag të pushimeve verore, zyrtarët sundimtarë, nuk harrojnë, që nën emrin e «polisave të sigurimit», të vazhdojnë grabitjet e tyre për mërgimtarët ende pa hyrë brenda kufirit të Kosovës.
Kësaj radhe, rolin e përkrahësit zyrtar të institucioneve të Kosovës e mori vetë kryeparlamentari Kadri Veseli.Përmes mashtrimit të ri, me qëllimin gjithnjë të vjetër, Kadri Veseli, priti para dy ditësh në konsultë Kryetarin e Këshillit të Byrosë Kosovare të Sigurimeve, Rrahim Pacollin që së bashku me Gani Thaçin, përbëjnë dyshen grabitqare të mërgimtarëve në pikat kufitare të Kosovës.
Ngritja e zërit dhe denoncimi para prokurorit të shtetit të bëhet urgjent dhe pa mëdyshje. Dyshja, Rrahim Pacolli dhe Gani Thaçi, të bëhen objekt i hetimit dhe të dërgimohn para gjykatës”, thuhet në një pjesë të komunikatës.
Por Shpendi para se të nënshkruante koalicionin me Selim Pacollin, kandidat i AKR-së për Prishtinës që doli i treti në lokalet e 22 tetorit, është takuar pikërisht me “zhvatësin” Rrahim Pacolli, takim i cili më pas dha frytet ku edhe u lidh bashkëpunimi për bashkëqeverisje në Prishtinë.
Pra, këto janë tre befasitë që brenda një jave bëri VV duke treguar se kjo parti ngadalë po ndryshon dhe nuk është më ajo e “egra” që nuk gjuan institucionet, nuk lidh koalicione e nuk bashkëpunon me njerëz që i quan zhvatës e dëmtues të buxhetit. /tesheshi.com/
