Policia e Kosovës ka arrestuar të hënën shefin e sektorit të Inspeksionit të Komunës së Prishtinës, Slaih Zybën dhe dy pjesëtar të sigurimit të Komunës, Ditar Canolli dhe Kushtrim Halilaj.
Por Komuna e Prishtinës, përmes një komunikate, e ka konsideruar si arbitrare ndërhyrjen e policisë në hapësirat e komunës.
“Policia e Kosovës në mënyrë arbitrare dhe pa asnjë autorizim ndërhyn në hapësirat e Komunës së Prishtinës. Policia e Kosovës, sot pa asnjë autorizim u fut në kabinetin e Kryetarit të Komunës së Prishtinës dhe pa fletëarrest me vete e arrestoi Salih Zybën, shef të sektorit të Inspeksionit të Komunës së Prishtinës, i cili në ato momente gjindej në detyrë, në kabinet të Kryetarit. Për më tepër Policia arrestoi edhe dy pjesëtarë të sigurimit të Komunës, Ditar Canolli dhe Kushtrim Halilaj, veç se e kryen detyrën e tyre duke i kërkuar autorizim policëve për të hyrë në objekt të Komunës. Komuna e Prishtinës është e indinjuar me kësi sjellje arbitrare të Policisë së Kosovës, të cilët në vend se të jenë shembull për respektim të ligjit dhe procedurave të punës, ata i dhunojnë këto procedura dhe e shkelin ligjin”, thuhet në reagimin e Komunës.
Nga ana e saj, Policia Rajonale e Prishtinës thotë se e ka respektuar urdhrin e gjykatës.
“Është zbatuar një urdhëresë nga Gjykata Themelore e Prishtinës, arsyeja është e gjykatës, ne nuk i komentojmë ato”, tha zëdhënësja e rajonit të Prishtinës, Flora Ahmeti. /tesheshi.com/
