Çelsi kryeson kampionatin anglez pas një serie të gjatë fitoresh. Një prej protagonistëve të këtij suksesi është Diego Costa, sulmuesi që kryeson dhe listën e golashënuesve, me 14 gola në 20 javë.
Londinezët do të luajnë sot në fushën e kampionëve në fuqi, ndaj Lestër Sitit. Por ata do duhet të bëjnë pa Diego Costa-n, që është lënë jashtë skuadre për shkak të përplasjes me personelin trajnues.
Mediat britanike thonë se sulmuesi nuk është stërvitur me skuadrën në tre ditët e shkuara pas një përplasjeje me përgatitësin fizik, Julio Tous, ndërkohë që Antonio Conte ka mbajtur anën e këtij të fundit.
Sulmuesi 28-vjeçar as që do të udhëtojë me skuadrën për sfidën e sotme, duke e vënë në dyshim të ardhmen e tij te Çelsi.
Sky Sports deklaron ndërkaq se klubi kinez Tianxhin Kuanxhian është gati t’i ofrojë Diego Costa-s 30 milionë paundë në vit, e për klubin të paguajë 80 milionë paundë për transferimin.
Ky klub drejtohet nga Fabio Cannavaro, dhe së fundi ka blerë belgun Axel Witsel. Transferimin e bën më të besueshëm takimi i agjentit të lojtarit, Jorge Mendes, të premten me të parin e klubit kinez.
Nëse Çelsi e lë lojtarin të largohet, do të humbiste pa dyshim një prej pikave kyçe të skuadrës, kontribues i padiskutueshëm në suksesin e deritanishëm. /tesheshi.com/
